EC-in inthlan neihna tur state pangate Vaccine semchhuah chak zawka kalpui turin ti

Election Commission of India (ECI) chuan assembly inthlan neihna tur state panga-a chief secretary-te hnenah lehkha thawnin, Covid-19 vaccine semchhuah hna chu chak zawka kalpui turin a ti.

Inthlan neihna tur zinga mi, Manipur-a first dose la zat la tlem chu a ngaimawh thu sawiin, Manipur sorkar chu ṭan la turin a hrilh.

Kuminah hian state panga - Uttar Pradesh, Punjab, Uttarakhand, Goa leh Manipur-ahte assembly inthlan hi neih a ngai dawn a ni. Ram chhungah hri leng thar leh mah se, Covid kaihhruaina dan zawm chungin heng state-ah hian inthlan hi buatsaih tum a ni.

Kar liam ta khan ECI hian state pangaa hri leng dinhmunte thlirin union health secretary Rajesh Bhushan chu review meeting an lo neihpui tawh bawk.

Uttar Pradesh leh Punjab-a vaccine pek chhuah tawh chu ram pum huapa vaccine pek chhuah rate aia a hniam avangin,health ministry chuan thil awmdan thlithlai turin multidisciplinary team a lo tir tawh bawk a ni.