Omicron vangin Delhi-in kartawpah curfew kalpui dawn

Delhi sorkar chuan Covid hri kai pung chho zel karah, nimin khan meeting neiin, Delhi khawpuiah kartawpah curfew an kalpui dawn tih deputy chief minister Manish Sisodia chuan a puang. Sorkar hnathawk, essential service lama hnathawk tiam loh zawngte chu an mahni in lama hnathawk tura tih an ni.

Delhi Disaster Management Authority chuan ni hnih chhung positivity rate 5% chunglamah a awm tawh a, hei hi hlauhawm chhinchhiahna Graded Response Action Plan (GRAP)-ah red alert a thlen phak tawh avangin khuahkhirhna thar hi an kalpui leh dawn a ni.

Delhi-ah hri kai zat, positivity rate emaw mi 100 zela positive rate eawm chuan san lam a pan zel a ni. Thawhṭanni khan hri kai thar mi 4,099 awmin, thihpui mi pakhat an nei a ni.Delhi-ah hian positivity rate chu 6.46% ni mekin, nikum May thla hnua a san ber ṭum a ni.

Nimin vek khan Delhi chief minister Arvind Kejriwal chuan Covid-19 a kai tih sawiin, a chenna inah a inkhung hrang nghal tih a sawi.

Delhi-ah hian zan dar 10- zing dar 5 thleng curfew hman mek a ni a, December 29 aṭang khan "yellow alert" khuahkhirhna hnuaiah an awm tawh a ni. Cinema, gym te chu khar an ni tawh a, dawr te chu a ni kar thlaka hawntir an ni. Metro train leh bus te pawh seating capacity zahve bak phurh an phal lo a ni.

Health ministry sawidanin, Delhi hian January thla laihawl lamah chuan nitin hri kai thar mi 20,000 - 25,000 inkar an neih tur thu leh damdawi-ina dahluh ngai pawh an pun mai theih tur thu a sawi.

Tuna hri kai mek dinhmun thlirin, Delhi hian January 8 aṭangin ni tin hri kai thar mi 8,000 - 9,000 an awm tur thu Union Health Ministry chuan a puang.

Patiala Medical College-a zirlai 100 bawr velte chuan Thawhṭanni khan Covid-19 an kai tih an puang. Thuneitute chuan zirlaite chu hostel chhuahsan vek turin an ngen nghal a ni.

Omicron hmuchhuak thei RT-PCR kit ICMR-in pawm
Indian Council of Medical Research (ICMR) chuan mihringa Omicron variant kai hmuchhuak thei RT-PCR kit, Omisure chu pawmpuina an pe.

India ramah Thawhṭanni khan Covid-19 kai thar 37,379 awmin an zinga mi 1,892 te chu Omicron kai thar an ni.