Kan tum hmasa ber chu BJP paihthlak a ni - Mamata

West Bengal Chief Minister Mamata Banerjee-i chuan kum 2019 Lok Sabha inthlanpui neih tur chu eptu pawlte chuan hruaitu pakhat kaihhruaina hnuaiah an bei dawn a, an tum hmasa ber tur chu BJP paihthlak a ni dawn tih a sawi.

Mamata Banerjee-i hi Delhi-ah a zin a, Nialini khan eptu party 10 hruaitute a hmu a ni. Banerjee-in eptu hruaitu a hmuh zingah hian Lok Sabha inthlan neih tura hruaitu pawimawh tur–Congress president Rahul Gandhi leh a nu Sonia Gandhi, National Congress Party hotu Sharad Pawar, Samajwadi Party hruaitu Ramgopal Yadav, Janata Dal Secular hruaitu Deve Gowda leh Delhi Chief Minister leh Aam Aadmi Party hruaitu Arvind Kejriwal-te pawh an tel a ni.

Kum 2019 inthlanpuia eptu ṭangrualten prime minister candidate atana an dah tur chungchanga zawhna chhangin, Mamata-i chuan hetiang thil sawipui lo tura a duh thu chanchinthar lakhawmtute a hrilh a, prime minister dinhmun changtu nih chu an ngaih pawimawh ber a ni lo tih a sawi. Ram hmasawn an duh a, loneitute leh kuthnathawktu ten nun nuam tak an neih a, khawtlanga muanna a awm an duh thu sawi. Inthlanpuiah BJP an hneh phawt hnuah, prime minister tur chungchang chu an la sawiho dawn chauh niin a sawi.