Eptu party 17-ten 2019 inthlanpuiah ballot paper hman dil dawn

Eptu party17-te chuan Election Commission of India (ECI) hnenah kum 2019-a Lok Sabha inthlanpui neih turah inthlanna felfai leh rintlak zawk neih a nih theih nan electronic voting machine (EVM) aiah ballot paper hmang tura dil an tum.

Congress kaihhruai eptu pawl hrang hrangte hian a ṭum khatna atan kar leh Thawṭanni hian joint meeting an nei dawn a ni. Eptu party-te chuan vote thlakna atan EVM bakah voter verifiable paper audit trial (VVPATs) hman tel pawh ni se an pawm thei dawn lo tih an sawi. Joint meeting-ah hian hemi chungchang hi sawihoin, Parliament-ah pawh sawiho tura nawr an tum dawn a, hemi hnu hian kar leh chhungin ECI hnenah thlen an tum a ni.

ECI chuan EVM te hi khawih chingpen theih loh a nih thu a lo sawi tawh a, hei bakah hian VVPAT chuan an vote ngei te chiang takin a tilang a ni, a ti. Party hrang hrangte chu EVM leh VVPAT an rin ngam lohna te paihbo turin a lo ngen fo tawh a ni.

Vote thlakna atana EVM aia paper ballot hman duhtu zingah hian eptu party zinga inhal tak Trinamool Congress (TMC) leh Left party te, Nationalist Congress Party te bakah centre-a rorellai NDA hnuaia BJP thawhpui Shiv Sena te, Telugu Desm Party leh YRS Congress te pawh an tel. Hetih lai NDA-a tel lo zingah AIADMK, Telangana Rashtriya Samithi leh Biju Janata Dal-te chuan ballot paper hman phutna hi an thlawp lo thung.

TMC Rajya Sabha MP Derek O'Brien chuan EVM chu an thil buaipui tur pakhat a nih thu sawiin, ballot system-a kir leh an duh tih a sawi. He thil hi party pakhat duhdan ringawt a ni lo a, party hrang hrang duh thuhmun neiten intelkhawmin he thil hi tihhlawhtlin tumin an bei dawn tih a sawi.

Hetihlai hian kum 2017 July thlaa all-party meeting neih ṭum khan, election commission chuan inthlan neih tur zawng zawng chu EVM leh VVPAT hmanga vote thlak vek a nih tawh tur thu a lo sawi tawh a ni.