UK aṭanga Nirav Modi thawn kir turin ngen

Minister of State for External Affairs VK Singh chuan Punjab National Bank (PNB) a sum tam tham tak tihchingpennaa mawhphurtu bera puh, lunghlua sumdawng lian Nirav Modi chu India rama thawn kir turin United Kingdom (UK) thuneitute ngen an nih thu a sawi.

Ningani-a Rajya Sabha inkhawmah he thu hi Minister Singh chuan sawichhuakin, UK thuneitute hnena ngenna hi High Commission of India (HCI), London hnenah Special Diplomatic Bag in a thawn tih a sawi.

Modi hi PNB-a cheng vaibelchhe 13,500 tihchingpenaah man tuma zawn mek a ni. He thubuaiah hian a pu, Gitanjali group neitu Mehul Choksi nen chhui mek an ni. Thubuai siamsak a nih hma hian India ram an chhuahsan hman a ni. Singh chuan Ministry of External Affairs (MEA) chuan Passports Act, 1967-a Section 10(3)(c) hnuaiah kumin February 16 khan Modi-a passport pawh hnawlsak a nih tawh thu a sawi bawk.

Hetih lai hian Nirav Modi hian Indian passport hi paruk vel zet a nei nia hriat a ni a, MEA in a passport a hnawlsak hnuah pawh a la zinkual thei nia sawi a ni.

Antigua sorkar chuan Mehul Choksi hi an ram khua leh tui nihna a pe tawh niin a sawi. Antigua and Barbuda-a Citizenship by Investment Unit (CIU) chuan Choksi-a tunhma chanchinte uluk taka enfiah hnu leh, Mumbai Police leh External Affairs Ministry-in clearance certificate an pek hnuah khua leh tui nihna hi an pe niin a sawi.