SC judge atana Justice KM Joseph dahna tur sorkar laipuiin pawmpui

Sorkar laipui chuan Supreme Court judge atana Uttarakhand High Court Chief Justice KM Joseph hlankai tumna chu a pawmpui ta. A hmain sorkar laipui hian Justice Joseph hlankai tumna hi lo dodalin a file te pawh senior judge-te awmna panel-ah a lo thawn kir tawh a ni.

Law ministry chuan Supreme Court judge atan hian Justice Joseph bakah Madras High Court Chief Justice Indira Banerjee leh Orissa High Court Chief Justice Vineet Saran te hlankaina tur hi a buaipui mek a ni. Mahse sorkar laipui chuan Justice Joseph-a bik hlankai tumna hi dodalin, Supreme Court-ah state dang aiawh an awm ṭha tawk lo nia chhuanlam siamin a lo dang a ni.

Mahse Supreme Court collegium chuan a ṭum hnihna atan Justice Joseph an thlan thu hi a sawi nawn leh a ni. Law ministry lam chuan sorkarin Justice Joseph a dodalna chhan hi mimal thil vang ni loin, dan kalphung vang zawk niin a sawi.

Collegium hian a ṭum hnihna atan Supreme Court judge tura hming ngai bawk a rawt leh a nih chuan sorkar laipui hian a lo pawmsak a ngai tawh a ni. Sorkar lam chuan hei vang hian collegium rawtna hian an lo dang thei tawh lo niin an tarlang.