Odisha sorkarin Mother Teresa Charity hnenah ṭanpuina sum nuai 78.76 pe dawn

Sorkar laipuiin Mother Teresa Charity, Missionaries of Charity-in ram dang aṭanga ṭanpuina leh chhawmdawlna a dawn theihna a tihtawp sak avangin, Odisha sorkar chuan he Charity-in hna a thawh chhunzawm zelna turin ṭanpuina sum tam tak a pe dawn.

Odisha chief minister Naveen Patnaik office chuan thuchhuah siamin, Odisha-a charity-in a enkawl, institution 13-te ṭanpuina turin Chief Minister's Relief Fund aṭang cheng nuai 78.76 pek a ni dawn tih a sawi.

He charity hi Nobel Peace Prize lo dawng tawh, Mother Teresa-in kum 1950-a a din a ni a, Kolkata-ah hmunpui neiin India ram chhung hmun hrang hrangah an inzarpharh a ni. Odisha-ah hian phar enkawlna leh fahrah in eng emaw zat an enkawl a ni.

Chief Minister Patnaik chuan district collector-te hnenah charity-in enkawl mek institution 13-ten fund hi an dawn ngei theihna tura enzui turin a ti bawk. Foreign fund an dawn chhunzawm theih loh avanga he pawlin an state-a an hnathawhah harsatna an tawh lohna tura ngaihven turin a hrilh vek tih thuchhuah chuan a tarlang.

Union home ministry chuan Krismas ni, nikum December 25 khan Missionaries of Charity-in foreign fund a dawn theihna chu a titawp sak a, charity-in Foreign Contributions Regulation Act hnuaia an licence renew tura a dilna chu a hnawlsak a ni. Hei vang hian charity chuan an centre-a ram dang aṭanga chhawmdawlna an dawnna account-te pawha tihtawp vek rih a ni.

Sorkar laipuiin Missionaries of Charity licence a renew sak duh loh acitivist leh pawl hrang hrangten an sawisel nasa hle.