India ramah hri kai thar 56% in pung

India ram hmun hrang hrangah Covid-19 hri kai thar an pung chak chho leh a, Thawhlehnia hri kai hmuh chhuah thar kha a hma ni aiin 56% in an tam zawk.

Thawhlehnia hri kai hmuh chhuah thar 58,097 chu nikum June 19 hnua ni khata hri kai thar tam ber ni a ni. Ni kua chhungin hri kai hmuh chhuah thar hi a let rukin an tam chho tawh a ni.

Kar khata hri kai hmuh chhuah, weekly positivity rate chu 2.60% a ni tawh a, daily positivity rate pawh 4.18% ah a kai chho leh tawh bawk.

State/union territory 24-ah Omicron variant kai hmuh chhuah an ni tawh a, Thawhlehni thlenga he variant kai hmuh chhuah tawh hi mi 2,135 an tling tawh. Maharashtra-ah tam berin mi 653 an awm tawh a ,a dawttu Delhi-ah 464 hmuh chhuah an ni tawh bawk.

Sorkar laipuiin hri kai, symptom nei lo leh la na lote home isolation chungchangah kaihhruaina thar a siam a, home isolation-a awm dawn chuan 24x7-a enkawl thei tur, vaccine dose kim la tawh an awm a ngai. Kum 60 chung lam leh natna benvawn neite chu doctor-in an dinhmunte uluk taka enfiah phawt hnuah home isolation phalsak chauh turin a ti. Home isolation awmna chhungkaw member dangte chuan home quarantine rules an zawm a ngai ang.

In lama hri inenkawl chuan triple layer clinical mask a vuah tur a ni a, N-95 chu duhthlan ber a ni. Tui bakah thil tuiril lam in nasa tura tih an ni.

Union health ministry chuan India ramah leh khawvel ram dangah pawh Omicron variant kai pung nasa mah se, hri kai thar tam zawk hi symptom nei lo leh la na lo takte an ni tih a sawi. Hei vang hian inkaihhruaina siamte ṭha taka zawm chuan hri kai in lama inekawlte pawh harsatna dang vak nei loin enkawl dam thuai an ni thei tih a sawi.