Rahul Gandhi-an hremna lekkawh thuai turin Bihar CM phut

Congress president Rahul Gandhi chuan Bihar-a Muzzafarpur shelter home-a hmeichhe naupang 34 pawngsual an nih chungchangah Bihar Chief Minister Nitish Kumar-a chu pawikhawihtute laka rang taka action la turin a phut tih a sawi.

Muzzafarpur shelter home-a thil thleng chungchangah CM Kumar hi hun eng emaw chen a ṭawngchhuah loh hnuin kar kalta Zirtawpni khan a ṭawngchhuak a, shelter home-a thil thleng chuan a tizak hle niin a sawi. Hei hi Rahul Gandhi chuan chhang zuiin, Nitish Kumar chuan a thusawi chu a ti tak tak a nih chuan rang takin hma a la nghal tur a ni, a ti.

Rahul Gandhi hian kar kalta Inrinni khan Rashtriya Janata Dal (RJD) kaihhruaia eptuten shelter home-a thil thleng duh lohna lantira sit-in protest huaihawtah telin, "Kan rama hmeichhia te pualin kan pungkhawm a ni. Nitish Kumar hi an state chhunga thil thleng hian a tizak tak tak a nih chuan rang takin pawikhawihtute chungah action a la nghal tur a ni", a ti. RJD hruaitu Tejashwi Yadav chuan shelter home neitu Brajesh Thakur chu hum tumah CM hi a lo puh tawh bawk.

Bihar-a eptu pawh hrang hrangte chuan Muzzafarpur shelter home-a thil thleng chungchangah JDU-BJP sorkar chu pawikhawihtute laka nem lutuk leh, action la duh lohah an puh a ni. Inrinni-a Delhi-a lungawi lohna an lantir hi Delhi Chief Minister Arvind Kejriwal, CPM general secretary Sitaram Yechury, CPI hruaitu D Raja, LJD hotu Sharah Yadav leh West Bengal Chief Minister Mamata Banerjee-ten an telpui bawk a ni.

Shelter home-a pawngsualna thleng kaihhnawihah hian Bihar sorkar chuan social welfare department-a official parukte chu an mawphurhna hlen lo leh inthlahdaha puhin a suspend. Official-te suspend-na hi Inrinni zan khan tihchhuah a ni. An enkawlna hnuaia awm shelter home thil awm dan dik tawk lo thleng chungchangah legal action la loah puh an ni.