J&K: Article 35-A chungchanga PIL thehluh ngaihtuah hun sawn

Article 35-A hnuaiah Jammu and Kashmir pawn lam mite chuan state chhungah immovable property an neih khapsak a ni. He Article khinna public interest litigation (PIL) thehluh ngaihtuah hun chu inlakhran duhtu pawlten nimin leh vawiin atan nawrh an huaihawt avangin sawn a ni.

Article 35-A chungchang PIL thehluh hi standing council kaltlangin Governor NN Vohran chuan a ngaihtuah hun hi sawn hla turin Supreme Court a ngen a ni.

Jammu and Kashmir inlakhran duhtu pawl intelkhawm, Joint Resistance Leadership (JRL) chuan Article 35-A khin tumna hi duh loin nimin leh vawiin atan state pumah nawrh an huaihawt. Kashmir Valley-ah chuan dawr leh sumdawnna hmun dangte pawh khar vek niin, kawngpuiah motor tlanchhuak pawh an awm lo. Nawrh huaihawt vang hian Kashmir Valley-a Amarnath Yatra neih mek pawh ni hnih chhung atan hian khar a ni bawk.

Buaina chhuak tur veng turin khawpui hrang hrangah security force-te dah an ni. Nawrh huaihawt hi Bar Association, transporters leh d traders' bodies te chuan an thlawp a ni. Article 35-A thlawpna lantir hian state chhunga party lian, National Conference leh PdP te pawhin rally an lo huaihawt tawh bawk a ni.

State sorkar pawhin Panchayat leh urban local body bakah municipal election te a awm chhoh dawn avangin hearing neih hun tur hi sawn turin a ngen dawn tih a sawi bawk.