Article 35A chungchang ngaihtuah hun atan August 27 ruat

Jammu and Kashmir-a state pawn lam mite ram leh hmun an neih khapsakna, Article 35A khin letna chungchang chu nimin khan Supreme Court chuan a ngaihtuah a, August 27-a ngaihtuah chhunzawm turin a ti.

Chief Justice Dipak Misra leh Justice AM Khanwilkar awmna bench chuan Article 35A chungchang hi judge pathum awmna bench in a ngaihtuah a ngai tih an sawi a, nimin khan bench member zinga mi Justice DY Chandrachud chu a awm ve lo a ni.

Apex court chuan August 27-ah Article 35A khin letna hi ngaihtuah turin a ti a, CJI Misra chuan he article hian ram danpui a kalh em tih pawh ngaithuah anih tur thu a sawi.

Article 35A hi 1954 Presidential Order-in Constitution-ah a tel a ni. Hemi hmang hian Jammu and Kashmir khua leh tuite chu special rights leh duhsak bikna pek an ni. State pawn lam mite chu an state chhunga ram leh hmun an neih khapsak an ni a, hei bakah hian an state mi hmeichhia, state pawn lam mi pasala neite chuan property rights an nei chhunzawm thei lo bawk a ni.

Court-ah Article 35A khin letna thehluh a nih rual hian a thlawpna petition pawh mimal leh civil society group eng emaw zatin an thehlut ve leh bawk a, J&K tana special status pek chu chhunzawm zel an phut a ni.