SC judge ruat tharte seniority pek tum danah judge-te lungawi lo

Supreme Court judge atana ruat thar, judge pathumte chu vawiin hian lakluh an ni dawn a, hetihlai hian judge ṭhenkhat chuan sorkar laipui chuan Justice KM Joseph-a seniority tihdanglam sak tumah puhin an lungawi lo hle.

Supreme Court collegium chuan kumin January thla khan judge atana Justice KM Joseph hlankai hi a lo rawt tawh a, mahse sorkar laipui chuan a pawmpui lo a ni. Mahse a ṭum hnihna atan collegium hian Justice Joseph hi a rawt leh a, hei hi sorkar laipui chuan a hnawlsak theih tawh loh vangin pawm a ni ta a ni.

Sorkarin Justice Joseph a dodalna chhan hi kum 2016-a Uttrakhand-a President Rule puan a tihtawp a, Congress-in sorkarna an chelh chhunzawm phah theih vang nia sawi a ni. Mahse BJP kaihhruai NDA chuan eptu lam puhna hi a dik lo niin a sawi thung.

Vawiin hian Supreme Court judge atana hlankai thar pathumte chu lakluh an ni dawn a, Justice Joseph hi an pathum zingah a hnuhnung bera lakluh tura tih a ni. Mahse SC judge tam tak hian judge tana lakluh tur dang pahnihin, Justice Indira Banjeree leh Vineet Sharan te hming aiin Justice Joseph hming hi rawt hmasak a nih avangin an thil tih dan hi a dik tawk lo niin an ngai.