Rajya Sabha-ah mihring pung chak chungchang an sawiho

Nimina Rajya Sabha rorel inkhawmah India ram mipui pung chak lutuk leh, a khuahkhirhna kalpui a ngaih chungchang sawiho a ni.

Zero Hour-ah BJP MP Ashok Bajpai chuan kum 2022-ah India ram mipui chu China mipui awm zat pelin khawvela mihring tamna ber ram a ni tawh dawn a, kum 2050-ah chuan India ramah mihring tluklehdingawn 1.66 an awm tawh dawn niin a sawi. Mihring pung chak lutuk chuan hmasawnna hna thawh thengin a nghawng buai thei dawn tih a sawi.

Bajpai chuan mihring pung chak lutuk khuahkhirh tur hian hma lak thui a ngai a ni, a ti. BJP MP dang Vijay Pal Singh Tomar pawhin Independence tirha mihring awm zat vaibelchhe 36 chu tunah vaibelchhe 135-ah a pung tawh a, mihring punna hi kum khatah vaibelchhe 2 ang zel a nih thu a sawi bawk.

Tomar chuan India-in khawvel puma chenna tlak ram zinga 2.4% chauh a neih laiin, khawvel mipui zinga 17.5% chu India-ah an awm thung a ni, a ti.