Punjab-a PM security felhlel chungchang vawiinah Supreme Court-in a ngaihtuah dawn

Prime minister Narendra Modi-a'n Punjab state a tlawh ṭum a security felhlel chungchanga petition thehluh chu vawiinah Supreme Court-in a ngaihtuah dawn.

Punjab sorkar chuan he thil thleng chhui tur hian team a din a, ni thum chhunga report thehlut turin a ti.

Supreme Court-a petition thehluhah hian PM security felfai tawk loh chungchangah Punjab chief secretary leh director-general of police chu mawhphurhtua ngai a, suspend nghal turin ngen a ni.

Nilaini khan PM Modi-a'n election rally nei tura Ferozepur, Punjab a pan laiin, kawng laka flyover-ah PM convoy hi minute 20 vel dan a ni. Khua a ṭhat loh avangin helicopter ṭum tirin, Bathinda aṭangin rally neihna tur km 100 vela hla chu motor-in an pan a ni. Mahse rally neihna hmun thlen hma km 10 velah loneitu nawrh huaihawtte chuan PM convoy hi hun eng emaw chen an lo dang a ni.

Home ministry chuan he thil thleng chungchangah hian Punjab police-te chu demin, PM kalna tur kawng hi ruahmanna fel tak hnuaiah an buatsaih tur a ni, a ti. He thil thleng vang hian BJP chuan Punjab-a Congress sorkar chu na taka sawiselin, union minister Smriti Irani chuan Congress party chu PM thah tuma phiarru ang hialah a puh zui.

Hetih lai hian Congress party chuan BJP-in remchanga hmana an beihna hi chhangin, protocol an zawm tak zet em tih an zawt let. Party thupuangtu, Randeep Surjewala chuan PM kal kawng tura ruahmanaah hian inbuatsaihna nasa taka kalpui a ni a, mahse tuna loneituten an lo danna kawng hi a tira a kalkawnga tura hriattir lawkah a tel lo tih a sawi. Rajasthan chief minister Ashok Gehlot pawhin he thila mawhphurtuber chu SPC a nih thu a sawi bawk.

Punjab chief minister Charanjit Channi chuan BJP president JP Nadda-a'n SOS call siam duh loha a puhna chu chhangin, "Punjabi ka nih angin Prime Minister venhimna atan hian thih pawh ka huam. Mahse he thil thlengah hian a nunna atana hlauhthawnawm engmah a awm lo a, security lamah felhlel pawh a awm lo," a ti.