Tleirawl Covaxin pekte nachhawkna pe lo turin ti

India ramah tleirawl, kum 15-18 inkarte chu Covid vaccine, Covaxin pek mek an ni a, he vaccine siamtu Bharat Biotech chuan vaccine pek an nih hnuah nachhawkna emaw, paracetamol emaw pe lo turin a ti.

Bharat Biotech chuan immunisation centre ṭhenkhat chuan tleirawlte hi Covaxin an lak hnuah paracetamol 500mg tablet ei turtein an hrilh tih thu an dawn thu sawiin, hei hi a ngai lo tih a sawi.

Company chuan mi 30,000 te laka clinical trial an neihah, vaccine lak hnua side effect awm hi 10-20% vel chauh niin, hengte pawh hian an la na lo hle a, ni hnih khat hnuah a reh leh mai a, hei vang hian damdawi ei hnan kher a ngai lo tih a sawi. Damdawi chu doctor-te an rawn hnuah ei chauh turin a ti a ni.

Drugs Controller General of India (DGCI) chuan thla hmasa khan kum 12 chung lamte tan emergency-a hman turin Bharat Biotech siam Covaxin hman hi a phalsak a ni. January 3 aṭang khan ram chhunga tleirawl, kum 15-18 inkarte hnenah vaccine hi pe ṭanin, Covaxin vek hi pek an ni.