India-a Omicron kai tam ber ni a thleng

India ramah Omicron variant a darh mek a, Nilaini kha ni khata he variant kai hmuh chhuah tam ber ni niin mi 495 an awm a, Omicron kai hmuh chhuah hi 2,630 an tling tawh.

Maharashtra chu Omicron kai tamna ber state niin 797 an awm tawh a, Delhi-ah 465, Rajasthan-ah 236, Kerala-ah 234, Karnataka-ah 226, Gujarat-ah 204 leh Tamil Nadu-ah 121 an awm tawh a ni.

Union health ministry data-a a lan danin khawpui lian, Delhi, Mumbai leh Kolkata-ahte Covid-19 hri kai an pung nasa hle a, mahse damdawi-in dah luh ngai erawh an tam lo thung. Hetih lai hian thingtlang lamah pawh hri a darh leh hlauhthawnna pawh a lian tawh hle.

Khawpui hrang hrangah hri a darh leh avangin khuahkhirhnate pawh siam thar leh a ni a, zan curfew bakah kartawp lockdown-te pawh an puang leh hlawm a ni.

Nilaini khan India ramah Covid kai 90,928 an awm thar leh a, hemi ni vek hian hri thihpui mi 325 an awm bawk. Ni khata hri kai hmuh chhuah 6.43% ah a kai chho leh tawh a, kar khata hmuh chhuah, weekly positivity rate pawh 3.47% a ni tawh.

Rajasthan-ah Omicron vanga thi awm
Sorkar laipui chuan Udaipur, Rajasthan-ah December 31-a thi chu Omicron variant vang tih nimin khan nemnghetin, India rama he variant thihpui hmasa ber a ni.

Omicron variant vanga thi hi kum 73 mi, Laxminarayan Nagar a ni a, December 15-ah Covid a kai tih hriatchhuah niin damdawi-inah enkawl a ni. December 21-ah a negative a, mahse genome sequencing ti tura a sample thawn result chu December 25-ah chhuakin Omicron variant a kai tih hmuh chhuah a ni. Ni ruk hnu, December 31 khan a thi a ni. Amah hi Covid vaccine dose kima la tawh leh ram pawn lama zin chhuahna nei lo a ni.