Naupang pawngsualtute tihhlum theihna tur bill pass

Parliament chuan Thawhṭanni khan hmeichhe naupang kum 12 hnuailam pawngsualtu tihhlum theihna tur bill leh, pawngsualtute hremna na zawk pek theihna tur bill a pass.

Thawhṭannia bill pass, Criminal Law (Amendment) Bill 2018 hian April 21-a Criminal Law (Amendment) Ordinance hman chu a thlak dawn a ni. He ordinance hi Jammu and Kashmir-a Kathua-a hmeichhe naupang pawngsual rawn leh thah zui a nih vang leh, Uttar Pradesh-a hmeichhe pakhat pawngsual rawn a nih hnua siam a ni. Criminal Law (Amendment) Bill 2018 hi July 30 khan Lok Sabha-ah pass a lo ni tawh a, Thawhṭanni khan Rajya Sabha-ah voice vote hmangin pawm a ni ve leh a ni.

Parliament-ah bill pass-ah hian pawngsualtute hremna na zawk pekna tur siam a ni. Kum 12 hnuai lam pawngsualtute chu thi ture hremna pek theih an ni dawn a ni. Hmeichhe puitling pawngsualtute hremna pek ṭhin nep ber, kum sarih chin pawh kum 10-ah tihpun a ni. Kum 16 hnuailam pawngsualtute hremna nep ber, kum 10 tih chu kum 20-ah tihpun a ni bawk a, hei bakah hian an hremna damchhung tang tura pawhsei theih a ni ang.

Eptu party-te chuan pawngsualtute hremna na zawk pek chu an thlawp thu an sawi rualin, a hmeichhe kum azira hremna tihdanglam a nih dan chu an hriatthiam loh thu TMC member Sukhendu Sekhar Ray chuan a sawi. Congress member Chhaya Verma pawhin pawngsual thubuaia thiam loh chantirte chu a pawngsual tawktu kum lama bithliah loin hremna in ang tlang vek pek nise a ti bawk.