Banerjee-in ATM chungchang chhui chian phut
West Bengal Chief Minister Mamata Banerjee-i chuan BJP kaihhruai sorkar laipuiin pawisa note lian pahnih a tih thih aṭang khan mipui nawlpui te economic security chu a chhiat phah tih a sawi a, hei bakah hian ATM-a thil dik lo thleng report hrang hrangte chu chhui chiang turin sorkar laipui a phut bawk.
Barnerjee-i chuan Kolkata leh hmun danga ATM aṭanga dik lo taka pawisa lakchhuah report awm chungchang pawh Parliament-ah an party, Trinamool Congress chuan an sawichhuak dawn tih a sawi.
ATM dik tawk lo awm ṭhin chu a tuartu mipuite an nih avangin Finance Ministry chuan a ngaihven vat a ngai a ni tiin, hetianga thil dik lo thlenga mawhphurtute chu chhui chhuah thuai an ngai a ni, a ti.
Sorkar laipuiin pawisa note lian pahnih a tih thih chungchang pawh sawichhuak lehin, "Thingtlang hmun kilkhawr tam taka bank branch pawh awm lohna ram retheiah sorkar laipui chuan economy rintlak loh, plastic economy a kalpui a ni. A thiltih hian mi naran zawkte economic security te a tihchhiat sak a ni", a ti. Ramchhung hmun hrang hranga mipuite dinhmun pawh zirchiang loin, sorkar lapui chuan digital economy a kalpui bawk a, hei hian mi tam tak dinhmun khirh leh harsa taka a dah tiin a sawi bawk.
State Consumer Affairs Minister Sadhan Pande chuan bank leh police official-te meeting a neihpuinaah bank-te chuan ATM khawih chingpenna thleng thei laka venna turin kum 2020 aṭangin khawl thar hman a ni dawn tih an sawi niin a tarlang. Minsiter chuan ATM zawng zawngte chu thil dik lo thleng tur venna atana local police station nena thlunzawm vek tura a duh thu a sawi.
Kar kalta khan Kolkata-a ATM aṭangin cheng nuai 20 lakchhuah nia sawi a ni a, he thil titu nia puh Romania ram mi pahnih chu Delhi-an man an ni tawh a, an kut aṭang hian debit card lem 20 bakah passport pahnih an man a ni. Police-te chuan bank account holder eng emaw zat hnen aṭangin an hriatpui loha an account aṭanga pawisa lakchhuah anih chungchanga complaint tam tak an dawn hnuah he thil hi an chhui zui a, ATM-a CCTV footage-te an zirchianna aṭangin pawikhawihtute hi an hre thei ta a ni.