Candidate-te sum hman theih zat tipung

Candidate-ten campaign-na atana an sum hman theih zat chu tihpun a ni.

Sum hman theih zat bithliah thar hi kumina assembly inthlan neihna tur, Uttar Pradesh, Uttarakhand, Punjab, Goa leh Manipur-ah hman nghal a ni ang. Kum 2014 hnua expenditure limit ennawnna lian tham an neihna hmasa ber a ni. Kum 2020 khan campaign-na atana sum hman theih hi 10% in tihsan a lo ni tawh bawk a ni.

State lianah inthlanpui neihna tura campaign-na atana candidate-te sum hman theih chu Rs nuai 95-ah tihsan niin, state te-ah Rs nuai 75-ah tihsan a ni bawk. Assembly inthlan bikah state lianah candidate-te sum hman phalsak zat chu Rs nuai 28 aṭangin Rs nuai 40-ah tihpun a ni a, state te zawkah chuan Rs nuai 20 aṭangin Rs nuai 28-ah tihpun a ni bawk.

Election Commission-in a ruat, Harish Kumar (retd. IRS Officer), Umesh Sinha (Secretary General) leh Chandra Bhushan Kumar (Sr. Deputy Election Commissioner) awmna committee chuan candidate-te sum hman theih zat tur leh a kaihhnawih chi hrang hrangte an zirchian hnuah rawtna an thlen a, an rawtna hi ngaihtuah a nih hnuah sum hman theih zat tihpunna hi Ministry of Law, Justice and Legislative Department chuan a tichhuak a ni.

Committee hian political party, chief electoral officer leh election observer hrang hrangte ngaihdan a lakkhawm hnuah rawtna hi a thehlut a ni. Zirchianna an neihah elector nasa taka an pun tawh bakah, kum 2015-2016 aiin kum 2021-22-a cost inflation index hi 240 aṭangin 317 (32.08%) ah a pung tawh bawk a ni.