Ramria sipaite intihbuainaah India leh China inpuh tawn

Ladakh khawchhak lam, Galwan Valley-a Thawhṭanni zana ramria India leh China sipaite silai telloa inbeihna thleng chungchangah, buaina chhuah chhanah ram pahnihte chu an inpuh tawn. 

Ramria sipaite intihbuainaah hian India sipai 20 an thi a, China lamah sipai pawh thi leh hliam an awm nia sawi ni mah se China lamin hemi chungchang hi a tarlang ve lo a ni. Ram pahnih sipaite intihbuainaah hian silai hmehpuah a ni lo a; lung, hmawlh leh hmanraw dangte an hmang nia sawi a ni. China lam chuan buaina a thlen hi sawi mah se sipai thi leh hliam chungchang engmah a sawi lang ve lo thung. 

Galwan Valley-a buaina thlen chhan tak hi  hriat chian ni lo mah se, May 5 aṭang khan ram pahnih sipaite inkara buaina hi a inmung chho tawh a ni. Hemi ṭum hian Sikkim-a ram pahnihte inrinaah India leh China sipaite hi an lo insualbuai chiam tawh a ni. India lam chuan Line of Actual Control (LAC) chungchanga inremna siam tawh thlak danglam tumah China hi a puh a, hetih lai hian China sorkar chanchinbu, Global Times editorial-ah chuan China-India ramria buaina awm chhan chu India lamin pawisak nei lo taka thil an tih vang niin a puh thung. 

India-China ramri, LAC ah ram pahnih sipaite hi dan kalha cheah puhin an lo inep fo tawh. Mahse indona erawh ṭum khat chauh thlengin, kum 1962 khan an indo a, India chu a tlawm zawkah a ṭang a ni. 

India chuan a ram chin, Galwan Valley-ah China chu a sipaite tir lut leh, India ram chin square km 38,000 luahsakah a puh. Ṭum tam tak ramri buaina chinfel dan ngaih­tuahin inbiakna lo nei tawh mah se, tun thlengin buaina hi an la chingfel thei lo a ni. Tun hnaia India-in LAC hrula kawng a siam thar chu China lam hian a ngaimawh hle bawk. 

Gawan Valley-a thil thleng vang hian Thawhlehni khan a hmunah India leh China sipai thuneitute chu an inbe nghal a, China foreign ministry pawhin press conference koin inbiakna hmanga remna siam tura hmalak a ṭul thu a sawi.

India lamah pawh union defence minister Rajnath Singh, external affairs miniter S Jaishankar, CDS General Bipin Rawat leh sipai dang hotu pathum te nen high level meeting neih nghal a ni. 

Nimin khan prime minister Narendra Modi chuan ramria sipaite inbeihna thleng leh ramri dinhmunte sawiho turin  June 19 tlai dar 5-ah all party meeting neih a nih tur thu a sawi. 

Prime Minister Office chuan virtual meeting neih tur chungchang hi sawiin, he hunah hian political party hrang hranga president-te an tel dawn tih a sawi. 

Narendra Modi chuan Galwan Valley-a China sipaite kut tuara thi, India sipai 20-te thihna chu a thlawn dawn loh thu leh, India chuan a ram chin inches tin chu a venghim tlat dawn tih nimina chief minister-te nena meeting an neihnaah a sawichhuak. "India chuan remna leh muanna a awm a duh a, mahse min tithinur a nih chuan an phu tawk chhanna a pe thei reng a ni," a ti. 

China sipaite nena inbeihnaa thi sipaite chu India chuan a chhuang hle a ni tiin, meeting-ah hian hian sipai thi te sunna hun minute 2 chhung ngawi rengin an hmang.

Congress hruaitu Rahul Gandhi chuan Thawhṭannia zana ramria India leh China sipaite intihbuaina thleng leh, India sipai 20 zet an thih chungchangah  prime minister Narendra Modi a ṭawngchhuah  mai loh avangin a sawisel. 

Ramria buaina hi Thawhṭanni zana thleng ni mah se, PM Modi hian Thawhlehni thleng khan engmah a sawichhuak lo a, nimin khan a ṭawngchhuak ve chauh a ni.

Rahul chuan ram leh hnam tana nun chan an awm laia lo ngawih emaw bihruk emaw chu a hun lo hle a ni, tiin nimin zing khan a sawi. Rajnath Singh hoa Thawhlehnia sipai hotute meeting neih a nih hnuah Singh hian hemi ni vek hian Modi hnenah he thil thleng hi a hrilh a ni.