DMK hotu Karunanidhi vuiliam a ni ; ta Marina Beach-ah phum a ni

Tamil Nadu chief minister hlui leh Dravida Munnetra Kazhagam (DMK) hotu Muthuvel Karunanidhi chu Thawhlehni zan dar 6.10 khan kum 94 mi niin Chennai-a Kauvery Hospital-ah a thi. Nimin khan vui niin, a ruang hi Marina Beach-ah phum a ni.

Karunanidhi hi July 28 khan infection a neih vang leh a khawsik sang vangin damdawi-inah hruai a ni a, ICU-ah dah luh nghal a ni. Ni 11 zet enkawl a, hma a sawn nia sawi a nih hnuah Thawhṭanni aṭang khan a dinhmun hi a tlahniam a, Thawhlehni zan khan a thi ta a ni.

Ṭum nga zet Tamil Nadu chief minister lo ni tawh, Karunanidhi hian kum 60 chuang zet politics a khel a, state chhung bakah ram pum huapah pawh politician hriat hlawh ber zingah a tel a ni. DMK party president pawh term 10 zet a chelh thei nghe nghe.

Karunanidhi ruang hi Chennai-a a chenna Gopalapururam-ah lak a ni a, hemi hnu hian a CIT Colony-ah a inah lak a ni leh a ni. Heta ṭang hian mipuiten DMK hotu hi an zahna an hlan theih nan nimin zing khan Rajaji Hall-ah lak leh a ni. Rajaji Hall bulah hian Karunanidhi ngaisangtu mipui pungkhawm an tam em vangin police-ten an hnawhdarh te a ngai hial a ni. Mipui pungkhawmte innekbuai vangin mi pahnih an thi a, midang 30 velin hliam an tuar bawk.

DMK chuan an party hotu ruang hi Chennai-a Marina Beach-a mausoleum complex-a Anna Memorial bula phum an dil a, hei hi AIADMK kaihhruai sorkar chuan a remti lo thung. AIADMK party chuan Marina Beach-ah hian chief minister nih laia thite chuah phum tur a ni tih an sawi a, mahse DMK chuan hetiang dan hi a awm lo niin an sawi thung. DMK chuan Madras High Court-ah petition an thehlut a, court chuan Thawhlehni zan khan a ngaihtuah nghal a, mahse state sorkar lamin an dodal avangin thu tlukna siam thei loin an titawp a, nimin zing khan ngaihtuah ṭha lehin Marina Beach-a Karunanidhi phum hi a remti ta a ni. Karunanidhi hi amah chherchhuaktu, CN Annadurai thlan bulah phum a ni ta a ni.

Hruaitu hrang hrangten Karunanidhi an ui leh sun thu an sawi a, an zingah hian President Ram Nath Kovind, Prime Minister Narendra Modi, Congress president Rahul Gandhi te pawh an tel. Prime Minister Narendra Modi chuan Karunanidhi thi chu a sun hle tih sawiin, India rama hruaitu hlun tak, mipuite hotu, mi fing tak leh thu ziaktu ṭha tak, mirethei leh hnuaihnung zawkte ṭhatna tura thawktu a ni, a ti. Nimin zing khan PM Modi leh Rahul Gandhi te chuan Karunanidhi thlah tur hian Chennai an pan a ni.

Karunanidhi sunnan hian nimin kha Chennai-a private bus operator-te chu an service lo a, theatre-te pawhin movie an chhuah lo bawk. State chhung hmun tam takah dawr khar a ni bawk. Karunanidhi hi parliament member ni lo mah se nimina Parliament in hnih inkhawmah a sunna hun hman a nih hnuin inkhawm tihtawp nghal a ni. Sorkar laipui pawhin Thawhlehni zan khan Karunanidhi sunna hi ram pumah ni khat chhung hman a ni dawn tih a lo puang tawh bawk.

Tamil Nadu sorkar chuan Karunanidhi sun nan nimin khan an state-ah pubilc holiday a puang a, ni sarih chhung sun a ni ang. Hemi chhung hian state chhunga sorkar hmun pawimawhahte hnam puanzar a ngul chanve-a zar vek a ni dawn a ni. Karnataka leh Bihar state pawhin Karunanidhi sunna hi ni hnih chhung an hmang dawn a ni.

Mathuvel Karunanidhi:
M Karunanidhi hi kum 1924, June 3-a piang a ni a, politics a luhchilh hmain Tamil film industry-ah screenwriter a ni ṭhin. Tamil literature lamah pawh a thawh hlawk hle a, thawnthu, lemchan leh memoir eng emaw zat a ziak a, Kalaignar (artist) tia hriat lar a ni ṭhin.

Kum 14 mi a nih aṭangin politics lam a tuipui ṭan a, kum 33 mi anih in 1957-a Tamil Nadu assembly inthlanah Kulithalai bialah thlan tlin a ni. Kum 1961-ah DMK treasurer niin, kum 1962 khan state assembly-ah eptu pawl deputy leader a ni. Kum 1967-a DMK an sorkar khan Public Works minister-ah dah a ni.

Kum 1969-a Annadurai a thih khan Karunanidhi hi Tamil Nadu chief minister-ah dah a ni a, DMK party hotu a ni zui nghal bawk. Hemi hnu hian chief minister hi ṭum li zet a ni zui leh a ni. Kum 2016 aṭang khan a hriselna a tlahniam a, hei vang hian politics lamah pawh an inhmang tlemin vantlang hmuhah pawh a inlan khat hle. Vantlang hmuha a inlan hnuhnung ber chuan a piancham vawi 94 na, kumin June 3 khan a ni.