Naupang enkawlna hmun 9000 chuang enfiah vek turin ti

Women and Child Development Ministry chuan ramchhunga naupang enkawlna hmun 9,000 chuang chu ni 60 chhunga enfiah vek turin thupek a tichhuak.

Bihar leh Uttar Pradesh-a naupang enkawlna hmuna mipat hmeichhiat lam hawia pawikhawihna thleng report a awm avangin ministry chuan he thupek hi a tichhuak a ni. Child care home enfiah hna hi National Commission for Protection of Child Rights in an thawk dawn a, thla hnih chhungin ministry hnenah report an thehlut dawn a ni.

Ramchhungah hian child care institution 9,462 a awm a, heng zinga 7,109 chu sorkara in register an ni. Naupang enkawlna in hrang hrangte hnena fund pek tam zawk hi sorkarin a pek a ni a, heng home enkawl tur hian NGO te hman an ni tlangpui bawk.

Women and Child Development Minister Maneka Gandhi chuan sate tinte chu home enkawltu, NGO hrang hrangten an hmansual leh naupangte humhim an nih theihna tura facility lian tak pakhat buatsaih tura a duh thu a sawi. Hei hi siam anih chuan state tan pawh hnathawh a awlsam thei zawk dawn a ni, a ti.