State 5-a assembly inthlan neih hun tur puang ; January 15 thleng physical campaign neih khap

Election Commission of India (ECI) chuan Inrinni liam ta khan state panga - Goa, Manipur, Punjab, Uttarakhand leh Uttar Pradesh state assembly inthlan neih hun tur a puang.

Inthlan neih hun tur puan rual hian Covid-19 hri leng thar leh vangin heng state pangaah hian January 15 thleng physical campaign leh rally-te neih khap a nih thu EC chuan a puang nghal bawk.

Chief election commissioner Sushil Chandra chuan health official-te nena ngun taka an ngaituah hnuah, thutlukna hi a siam anih thu a sawi.

Uttar Pradesh-ah assembly inthlan hi thawh sariha neih a ni dawn a, February 10, February 14, February 20, February 23, February 27, March 3 leh March 7-ah vote thlak a ni ang.

Punjab, Goa leh Uttarakhand-ah chuan ni khatah inthlan hi zawhfel nghal a ni dawn a, February 14-ah an inthlang dawn a ni.

Manipur-ah chuan inthlan hi thawh hniha neih a ni dawn a, February 27 leh March 3-ah vote thlak a ni ang.

State panga inthlana vote tlate hi March 10-ah chhiarin result puang nghal a ni ang.

Assembly inthlan neihna tur state pangaah hian constituency 690 a awm a, vote nei vaibelchhe 18.34 an awm bawk.

Chandra chuan ram chhunga Omicron variant darh mek avangin inthlan neihna turah hian January 15 thleng roadshow, padyatra, cycle/bike rally, vehicle rally, physical rally bakah pungkhawmna dangte huaihawt khap a ni tih a sawi. January 15-ah EC chuan state dinhmunte hi enin, physical campaign phal a nih dawn leh dawn loh a ngaihtuah ṭha leh dawn a ni, a ti.

Inthlan neihna tur state tinah Covid-19 hri laka invenna te khauh taka kenkawh a ni dawn a, polling staff-te pawh vaccine dose kima la tawh vek an ni dawn tih Chandra chuan a sawi. Inthlan neih hun tur ruat hmain union health secretary leh health expert-te pawh an biakrawn vek thu a sawi a, kar liamta Zirtawpni thleng khan Goa-ah hian vote nei zinga 95.8% chu vaccine dose kima la tawh an ni, a ti. Uttarakhand-ah voter, vaccine dose kima la tawh hi 82.39% awmin, Punjab-ah 45.6%, Manipur-ah 44.8% leh Uttar Pradesh-ah 52% an awm tawh bawk.

Uttar Pradesh-ah Covid weekly positivity rate hi 0.24% ni mekin, Uttarakhand-ah 1.01%, Punjab-ah 2.1%, Manipur-ah 1.1% leh Manipur-ah 13% a ni mek a ni.