India-China commander level talk nei dawn

India leh China chuan ramri chungchanga inbiakna ṭum 14-na, commander-level talk chu January 12 hian an nei leh dawn.

He inbiakna hi Ladakh khawchhak lam, Line of Actual Control (LAC)-a India ram chin lam, Chushul border point-ah neih tum a ni a, Ladakh khawchhak lama an buaina neih mek chungchangte an sawidun ang.

India lam hian friction point-a China sipai la awmte inhnukdawk tura a ngen rin a ni.

Nikum October 10 khan inbiak vawi 13-na hi an lo nei tawh a, mahse hemi ṭum hian inremna mumal an siam thei lo. November 18-a virtual diplomatic talk neihah khan ram pahnihte hian sipai aiawhte inbiakna ṭum 14-na neih chhunzawm leh hi an rel a ni.