Covid daily positivity rate 10.21% a ni tawh

India ramah Covid-19 hri kai an pun belh zel a, Inrinni khan hri kai thar 1,59,632 awm belh lehin, ni 225 hnua ni khatah hri kai thar tam ber ni a ni. Sample test aṭanga hri kai hmuh chhuah, positivity rate chu 10.21% ah a kai chho tawh.

Covid-19 hri chi thar leh darh chak tak, Omicron variant chu state leh union territory 27-ah hmuh a ni tawh bawk.

Ni khata hri kai hmuh chhuah, daily positivity rate chu 10.21% niin, kar khata hmuh chhuah, weekly positivity rate chu 6.77% a ni tawh a ni.

January 3 aṭangin kum 15-18 inkarte hnenah Covid vaccine pek chhuah ṭan niin, Inrinni zan thleng khan tleirawl vaibelchhe hnih chuangte vaccine hi an la tawh. Ram pumah vaccine hi dose vaibelchhe 151.58 pek chhuah a ni tawh tih union health ministry chuan a sawi.

Omicron kai hi Inrinni khan 616 awm thar lehin, he variant kai hmuh chhuah hi 3,623 an awm tawh. Maharashtra-ah tam berin 1,009 an awm tawh a, Delhi-in dawtin 513 hmuh chhuah an ni tawh. Omicron variant kai zinga 1,409 chu an dam leh tawh a ni.

Hri inkaidarh dan, R value chu kar liam ta khan 4 a tling chho a, nikuma India rama hri leng thawh hnihna a thlen vanglai khan 1.69 a ni.

Parliament staff 400 chuangin hri kai
Parliament budget session neih tur atana inbuatsaih mek karah,Parliament staff 402-te chu January 4-8 inkar khan Covid-19 hri an kai tih hmuh chhuah an ni. Omicron variant an kai em tih finfiah nan an sample-te hi genome sequencing turin thawn vek an ni tih official chuan a sawi.

Parliament-ah hian staff 1,409 awmin, an zinga hri kai hmuh chhuah 400-te bakah an contact hnaivaite chu an inkhunghrang mek bawk.