Kerala-a tuilian vangin mi 10,000 sawn chhuak tawh

Kerala state-ah ruahsur nasat avangin tui a lian a, mi 10,000 chuang chu hmun him lamah sawnchhuah an ni tawh. Tuilian vang hian mi 27 an thi tawh nia sawi a ni bawk.

Ruahsur nasa vanga tuilian leh leimin hi state hmarlam bial leh Idukki district-ten an tuar nasa zual a, TKochi-a Aluva Mahadeva Temple pawh tuilian hian a chim tawh a ni.

State chhunga lui lian ber, Priyar lui chu a lian nasa tawh hle. Tui lian hian Kochi-a hmun hniam laite a chim bakah, Cochin International airport tan pawh a hlauthawnawm tawh hle nia sawi a ni.

Kerala State Electricity Board (KSEB) chuan tui level sang zel avangin nimin khan Idduki Dam project hnuai ami, Cheruthony Dam-a shutter panga a hawng. Heng shutter-te kum 1992 aṭang khan hawn an la ni leh lo a ni. Dam hrang hranga tui level sang zel avangin tui paih chhuak turin reservoir 24 hawn a ni tawh a ni.

Idukki district-ah resort-ah ruahsur nasa avanga leiminin inkalpawhnate a hnawh avangin khualzin 69 an tangkhang mek a, an zingah hian ramdang mi 20 an tel. Leiminin kawngpui a hnawhte thianfai tur hian sipaite koh luh an ni.

Ningani khan Chennai-a US consulate chuan hriattirna tichhuakin, US mite chu leimin leh tuilian thlenna bial hrang hrangte tlawh rih lo turin a ti a ni. Idukki district mipuite pawh fimkhur turin thuneituten an chah bawk.

Idukki, Wayanad, Kozhikode leh Malappuram district-ahte tuilian tuarte chhanchhuah leh chhawmdawl hna hi Indian Army bakah Coast Guard leh National Disaster Response Force (NDRF) ten an thawk mek a ni. State disaster control room chuan tuilian vanga hruaichhuah, mi sing chuangte awmna tur hian hmun hrang hrangah relief camp 241 siam a ni tawh tih a sawi.

Union Home Minister Rajnath Singh chuan Kerala-a tuilian tuarte ṭanpui turin sorkar laipui chuan theihtawp a chhuah tur thu a sawi. Kerala Chief Minister Pinarayi Vijayan pawh biak a tum a, mahse a la be thei lo niin nimina Lok Sabha inkhawmah a sawi. July thla tir khan sorkar laipui chuan Kerala-a tuilian tuarte chhawmdawlna turin cheng vaibelchhe 80 a lo pawm tawh a ni.

Kerala ṭhenawm state, Tamil Nadu Chief Minister K Palaniswami chuan Kerala state ṭanpuina atan hian cheng vaibelchhe nga an pek tur thu a puang.