India ramah Covid-19 kai nuai ruk chuang tawh

Covid-19 hri kai tam ram palina ni mek India ramah chuan nimin thleng khan Covid-19 kai mi 6,04,641 an awm tling tawh.

Hrilengin ziaawm lam a pan thei lo a, Ministry of Health and Family Welfare-in report a tihchhuahah chuan dakar 24 chhungin hri kai hmuh chhuah thar 19,148 an awm a, 11,881 enkawl dam awmin mi 434-in an thihpui leh bawk.

India ramah hian hri kai enkawl dam pawh an tam tawh hle a, nimin thleng khan mi 3,59,860 chu enkawl dam tawhin enkawl dam rate hi 59.51% a ni. 

Hetihlai hian hri kai mek 2,26,947 an la awm a, mi 17,834-in an thihpui tawh.

Indian Council of Medical Research (ICMR) chuan ni khatah Covid-19 sample 1,29,558 an test tih nimina report an tihchhuahah tarlangin, hri len ṭantirh aṭang khan sample 90,56,173 an test tawh a ni. Nimin thleng khan ram pumah sorkar laboratory 768 leh private laboratory 297-ah test an kalpui tawh a ni.

Hripuiin a nghawng nasat ber state Maharsahtra-ah chuan nimin khan hri kai 5,537 an hmuh chhuah belh leh a, hri kai 1,80,298 lai an awm tawh a ni. Heng zinga 93,154 hi enkawl dam tawhin 79,091 chuan an la vei mek a ni. Darkar 24 chhungin mi 2,243 lai an enkawl dam a, mi 198 thihpui awm lehin hri len ṭantirh aṭang khah Maha-ah hian hripui vangin mi 8,053 an thi tawh. 

Tamil Nadu-ah pawh hri kai an pun belh zel a, kai hmuh chhuah thar 3,882 lai awm lehin mi 94,049-in hri an kai tawh a, hetianga an pung zel a nih chuan kar loah nuai chuangin hri an kai tih hmuh chhuah a ni dawn. Enkawl dam tawh 52,926 awm tawhin mi 39,859 chuan an la kai mek a, mi 1,264 laiin an thihpui tawh bawk. 

India ram khawpui Delhi-ah chuan hri kai 89,802 an awm tawh a, 2,442 hmuh chhuah thar an awm leh a ni. Enkawl dam pawh an tam tawh hle a, 59,992 chu an dam leh tawh laiin 27,007 chuan hri hi an la kai mek a, mi 2,803-in an thihpui tawh a ni.

Nimin tlaiah khan Union home minister Amit Shah kaihhruaina hnuaiah video conferencing-in Uttar Pradesh chief minister Yogi Adityanath, Haryana chief minister Manohar Lal Khattar leh Delhi chief minister Arvind Kejriwal-te chuan Delhi-NCR-a Covid-19 hri len dan dinhmun thlirin meeting an nei.

Meeting-ah hian Home Ministry leh Health Ministry official-te pawh an tel a ni. June 18 khan Amit Shah hian Kejriwal leh Delhi, Haryana leh UP sorkar official pawimawhte chu Delhi-NCR-a Covid-19 chung changah hian meeting a lo neihpui tawh bawk.