Madhya Pradesh ministry tilian Minister thar 28 lalut

Madhya Pradesh chief minister Shivraj Singh Chouhan kaihhruai BJP sorkara council of ministers atan nimin khan mi 28 lakluh belh a ni. 

Nimina minister tana lakluhte hi minister of state pariat leh cabi­net minister 20 te an ni. Acting governor Anan­diben Patel chuan Raj Bhavan-ah rinawmna thu tiam tirin a lalut. Thla thum liam ta khan Kamal Nath kaihhruai Congress sorkara MLA 22 chu sorkar lakah helin an bang a, BJP an zawm  a ni. An zingah hian Congress hruaitu lar ṭhin Jyotiraditya Scindia pawh a tel. Congress sorkar chu paihthlak niin, BJP sorkar a ding zui a, March 22 khan Chouhan chu Chief Minister atan lakluh  niin, a rual hian minister panga lakluh tel an ni. 

Hun eng emaw chen ministry tihlen loha a awm hnuin, Chief Minisrer chuan Governor hnenah minister atana a ruat thar mi 28 te list hi thawnin, nimin khan lakluh an ni ta a ni. Minister atana lakluh zingah hian Scindia hnungzuia BJP zawmtu, Congress member hlui 12 an tel. Mahse minister dinhmun chelh zui tur chuan thla ruk chhunga state assembly member atan thlan hman an ngai dawn a ni. By-election neih hun tur hi puan a la ni lo.