Covid booster dose pek chhuah ṭan a ni

India ramah nimin aṭang khan Covid booster dose, precautionary dose tia sawi chu heathcare leh frontline worker-te bakah, kum 60 chin natna benvawn neite hnenah pek chhuah ṭan a ni ta.

Precautionary dose hi Covid vaccine dose hnihna an lak aṭanga thla kua tling tawhte hnenah pek a ni a, vaccine pawh hi a hmaa an lo lak tawh ang pek an ni bawk.

Covid dose thumna la thei hi mi vaibelchhe 5.75 an awm a, heng zinga vaibelchhe 2.75 chu kum 60 chunglam niin, healthcare worker vaibelchhe 1.05 leh frontline worker vaibelchhe 1.9 an awm. Union health minister Masukh Mandaviya chuan precaution dose la thei chin mi vaibelchhe khat chuangte chu la tura hriattirna SMS thawn vek an nih thu Pathianni khan a sawi.

Sorkar laipui chuan puitling zawng zawngte hnenah booster dose pek a nih dawn leh dawn loh chungchangah thutlukna a la siam lo.

Mandaviya-a'n state health minister-te meeting neihpui
Union health minister Dr Mansukh Mandaviya chuan nimin khan Covid-19 hri leng mek dinhmun sawipuiin, state panga leh UT pakhat health minister-te meeting a neihpui.

Meeting hi chawhnu dar 3.30-ah virtual hmanga neih a ni a, Rajasthan, Madhya Pradesh, Goa, Gujarat, Maharashtra, Daman and Diu health minister-te an tel.

Pathianni khan India ramah Covid-19 hri kai thar 1,79,723 an awm belh leh a, hemi ni hian hripui thihpui mi 146 an awm bawk. Omicron variant kai pawh hmuh belh zel niin, mi 4,033 an tling tawh.

PM hoin Covid review meeting nei
Prime minister Narendra Modi kaihhruainain Pathianni khan ram chhunga hri leng thar leh chungchang thlirin, high-level meeting neih a ni. Hri leng thar leh avanga health infrastructure lam buatsaih dan te, vaccination campaign neih mek leh Omircron variant chungchangte an sawiho a ni.

Meeting-ah union home minister Amit Shah, union health minister Dr Mansukh Mandaviya, home secretary Kumar Bhalla, cabinet secretary Rajiv Gauba-te an tel a, official dangte pawh video conference kaltlangin an tel bawk.

PM Modi chuan hri kai thar tamna hmunte chu uluk taka thlitlai reng a, a ṭul anga puihna pek zel a nih tur thu a sawi. Hemi rual hian uluk taka face mask hman leh, physical distancing dante zawm ṭhat leh a ṭul thu a sawi bawk.

State hrang hrang dinhmun te, hmalak dan tur ṭha leh mipuite hriselna dinhmun sawihoa chief minister-te nen meeting neih a nih tur thu PM chuan a sawi.