Delhi leh state dang 5-te inralring turin hriattir

India Republic Day, January 26 thlen denchhenin firfiakten pawikhawihna thlen an tum nia intelligence lamin thu an dawn avangin Delhi bakah inthlan neihna tur state pangate chu inralring tura hriattir an ni.

Delhi khawpui leh ram chhung hmun danga Republic Day lawmna muanawm tak a awm theihna turin kaihhruainate pawh tihchhuah a ni bawk.

Firfiakten political leader-te bakah security force campus, sorkar building pawimawh, bazar lun lai bakah rel station leh sakhaw hmunte beih an tum niin intelligence lam chuan an sawi. Hei vang hian sorkar laipui chuan security leh intelligence agency hrang hrangte chu venhimna ṭha taka kalpui tura stakeholder hrang hrangte nena thawkho turin a ti.