LS Speaker hlui Somnath Chatterjee a thi

Lok Sabha Speaker hlui Somnath Chatterjee chu heart attack vangin nimin zing dar 8:15 khan Kolkata hospital-ah a thi.

Kum 89 mi, Chatterjee hi a kal (kidney) ṭha lo vangin kar kalta Thawhlehni khan damdawi-inah dah a ni a, ICU-ah dahlut nghalin ventilator hman tir nghal a ni a, doctor rual 12 ten an enkawl a ni. Pathianni khan Chatterjee hian heart attack a nei a, hei hi a thihpui ta niin an sawi. Chatterjee hi thla hmasa khan stroke vangin damdawi-inah dah luh a lo ni tawh bawk.

Chatterjee hian a nupui Renu Chatterjee, a fapa Pratap leh fanu pahnih Anuradha leh Anushila te a kalsan a ni.

Hruaitu hrang hrangten Somath Chatterjee an ui thu hian sawi a, Prime Minister Narendra Modi chuan Chatterjee chu mi rethei leh dinhmun chhe zawkte tana theihtawpa aw chhuah ṭhin a nih thu a sawi. Indian politics-a mi pawimawh, Parliamentary democracy tihausatu a ni tiin, a kalsan tak a chhungte a tawrhpui thu a sawi.

Congress president Rahul Gandhi pawhin Chatterjee a ui thu a sawi a, midangte tana inzirna, MP term 10 ni thei leh parliament member-ten an zah leh ngaihsan tak a nih thu a sawi.

Delhi Chief Minister Arvind Kejriwal leh Jammu and Kashmir CM hlui Omar Abdullah te pawhin Chhatterjee an ui thu hi sawiin, an mi ngaihsan a ni tih sawiin, India in mi ropui tak a chan ta niin an sawi. Finance Minister hlui P Chidambaram pawhin Chatterjee chu mi ropui, democracy chawinung tu, rilru zau tak a ni tiin a ui thu a sawi.