Bawng humhalh duh vangin BJP MLA party aṭangin a bang

Telangana-a BJP MLA T Raja Singh Lodh chuan Pathianni zan khan party-ah banna thehlutin, a banna chhan chu bawng humhalhna tura an hmalakna party-in a thlawp ṭhat loh vang niin a sawi.

Goshamahal consti-tuency MLA Singh chuan a social networking site-ah video a post-ah, bawng humhalh duh vanga a ban thu hi a sawi a, a banna lehkha pawh Telangana BJP president K Laxman hnenah a thawn tih a sawi.

BJP MLA chuan, "Ka tan chuan Hindu leh bawng humhalh hi thil pawimawh hmasa ber a ni a, politics hi chu a pahnihna chauh a ni. Bawng humhalh nan BJP aṭang hian ka bang a ni. Assembly-ah pawh bawng humhalh chungchang hi ka sawichhuak fo a, mahse party hian min thlawp ṭha lo a ni", a ti. Amah leh bawng humahalh duhtute chuan an hna an thawh chhunzawm zel dawn a, state chhunga bawng talh titawp turin an bei zel dawn tih a sawi.

Tun hma lam pawhin inhuatna chawk tho thei zawnga thu a sawi ṭhin avangin Singh hi police-te pawhin thubuai an lo siamsak fo tawh a ni. "Bawng humhalh an nih theih nan a ṭul chuan mi kan that ang a, a ṭul chuan kan thi mai ang. Kan tum ber chu bawng talh ṭhin tihtawp hi a ni", tiin a lo sawi tawh a ni. Bawng humhalhna tura an hmalakna kawngah BJP chu harsatna thlen sak a duh lo vangin a bang ta niin a sawi bawk.