Tuilian vangin Rs vbch 8,316 hu hloh a ni tawh: Kerala CM

Kerala Chief Minister Pinarayi Vijayan chuan an state-a ruahsur nasa vanga tuilian leh leiminin chhiatna hrang hrang a thleng vanga an hloh chu cheng vaibelchhe 8,316 hu a nih thu a sawi. Kerala sorkar hian sorkar laipuiah chhawmdawlna cheng vaibelchhe 400 pe turin a dil belh mek a ni.

Pathianni khan Union Home Minister Rajnath Singh leh CM Vijayan-ten hian thlawhtheihna hmangin tuilenna hmun hrang hrangte an enkual a, hemi hnu hian union minister hnenah CM hian memoradum a thehlut nghal a ni. CM chuan tuilianin chhiatna a thlen vanga an thil hloh chu Rs vbch 8,316 hu a tling tih a sawi a, hemi rual hian tuilianin thil a tichhiatte siamṭhatna tur leh, tuilian tuarte chhawmdawlna atan National Disaster Relief Fund (NDRF) aṭanga cheng vaibelchhe 1,220 pe turin a dil. Hemi hnuah hian sorkar laipuiah Rs vbch 400 hi a dil belh leh bawk. CM chuan an state-a chhiatna thlengte endik tura central team tir turin a ngen bawk.

Union Minister Singh chuan Kerala chuan Indepdence hnua tuilian a tawrh nasa ber ṭum a nih thu sawiin, chhawmdawl hna thawhna atan cheng vaibelchhe 100 pek nghal a ni dawn tih sawi. Kerala state mipuite harsatna tawh mek chu a hriatthiampui tih a sawi.

Kerala-a tuilian leh leiminin chhiatna a thlen vanga thi hi mi 39 an tling tawh a, kar kalta Inrinni aṭang khan chhiatna thleng vanga thi an awm belh hriat a ni lo tih official-te chuan an sawi. Mi 14,000 chuang chu hmun him lamah sawnchhuah niin, relief camp hrang hrangah dah an ni.

Chhiatna thlen nasat zualna hmun, Kozhikode, Idukki, Malappuram, Kannur leh Wayanad-ah chhanchhuahhna thawk turin Army bakah Navy, Air Force leh NDRF team te tirh an ni. A tul dan azirin chhanchhuah hna thawktu tur hi thawn belh an ni dawn tih minister chuan a sawi bawk.