Pune-a Cosmos Bank server hack sak Account dangah Rs vbch 94 chuang transfer

Pune-a Cosmos Co-operative Bank Ltd. chuan nimin khan police-ah complaint thehlutin, an bank main branch server chu ṭum hnih hack a nih thu leh, India ram chhung leh ram pawn lama account-ah cheng vaibelchhe 94 chuang transfer a nih thu an sawi.

India rama cooperative bank lian ber dawttu, Cosmos Bank official-te chuan Chatusghringi police station-ah complaint hi thehlutin, an bank server chu August 11 leh August 13-ah hack a nih thu an sawi. Police station-ah hian an server hack saktu mi tu tih hriat loh leh Hong Kong-a company-te lakah complaint hi an thehlut a ni.

Bank server hack a nih hnuah, August 11 khan chawhnu dar 3 leh zan dar 10 inkarah transaction vawi 15,000 chuang tih a nih thu an sawi. Visa card hmangin transaction hi ṭum 12,000 siam a ni a, Rupay card hmangin transactin vawi 2,849 siam a ni bawk.

Cosmos bank aṭanga sum rukte hi an chhuinaah cheng vaibelchhe 78 chu Hong Kong-a transfer niin official-te chuan an sawi. National Payments Corporation of India (NPCI) leh VISA kaltlangin India ramah Rs vbch 2.5 chu transfer a ni bawk.

Hacker-te hian Thawhṭanni zan dar 11.30 khan server hi khawih lehin, cheng vaibelchhe 13.92 chu Hong Kong-a Hang Seng Bank-a ALM Trading Limited account-ah an transfer leh a ni. Hacker-te hian account holder-te card dang tel chu a lem an siam nia sawi a ni.

Chatshrungi Police station in-charge Dayanand Dhome chuan Cosmos bank complaint thehlut hi chhui zui nghal a nih thu a sawi. Bnak official pakhat chuan an chhuinaah an bank hi Canada ram atanga hack nia a lan thu a sawi.

Cosmos Bank hi kum 1906-a din niin, ramchhunga urban co-operative bank upa ber zinga mi a ni. Regional office panga neiin, state pasarih-ah service outlet 140 a nei bawk.