TRS-in BJP thawhpui tum lo

Telangana Rashtra Samithi (TRS) hotu leh Telangana Chief Minsiter K Chandrasekhar Rao chuan an party chuan Bharatiya Janata Party (BJP) a thawhpui dawn lo tih sawiin, TRS chu sakhaw tih bik nei lo party a ni reng dawn a ni, a ti.

Congress party-in TRS leh BJP ten a ruka inhriatthiamna leh thawhdunna an nei nia an sawi chu thu dik lo a nih thu Rao chuan a sawi. Congress leh BJP chu ram hruaina kawnga hlawhchhamah puhin, ramin chak zawka hma a sawn theihna tur chuan politics-a inthlak danglamna nasa tak a thlen a ngai tih a sawi.

Prime Minister Narendra Modi nena meeting an neih chungchang chu party pahnihte thawhdunna tur lam hawi ni loin, an state kaihhnawih thil an sawi niin a sawi a, a ṭul a nih chuan an state mamawhte sawipui turin a la hmu zel dawn tih a sawi bawk.

TRS hotu hian tun thla tir lam khan PM hi a hmu a, hei hi thla hnih chhunga PM a hmuh ṭum hnihna a ni. Hei vang hian state assembly inthlan leh Lok Sabha inthlan awm turah party pahnihte hian thawhdun an tum nia rinna a awm phah a ni.

CM chuan assembly inthlanah an party chuan thawhpui nei loin a mal din dawn tih a sawi a, thla tharah an party candidate turte pawh an puang dawn tih a sawi. Nakkuma Lok Sabha inthlanpui neih turah pawh Congress leh BJP tel lohna ṭangrual pawl din a duhna chu ala ngai reng ti ha sawi a, hei hi tihhlawhtlin a nih ngei pawh a beisei thu a sawi.