Ram pumah I-Day lawm a ni

India Independence Day vawi 72-na chu nimin khan ram pumah lawm a ni a, a lawmna pui ber New Delhi-a Red Fort-a neihah Prime Minister Narendra Modi chuan hnam puanzar pawtpharhin thu a sawi.

PM Modi hian Red Fort a pan hmain Amar Jawan Jyoti a tlawh hmasa a, ram tana nunna hlantu sipaite zahna a hlan. Hemi hnu hian Rajghat a tlawh leh a ni.

PM Modi hian nakkuma Lok Sabha inthlanpui neih hmaa Independence Day lawmnaa a thu sawi hnuhnunna ber a ni a, minute 82 chhung thu a sawi. Kum 2016 khan I-Day lawmnaah hian minute 96 chhung thu sawiin, I-Day lawmnaa prime minister thu sawi tawh zinga la rei ber a ni.

Modi chuan a kaihhruai NDA sorkar hmalakna hrang hrang leh hlawhtlinna an neihte tarlangin, mega health scheme Ayushman Bharat chu Bharatiya Jana Sangh co-founder Deendayal Upadhyaya-a pian champha, September 25 aṭanga hman ṭan tur a nih thu te, India Independence Day vawi 75-na, kum 2022-ah chuan van thengrengah India tir chhuah tum a nih thute a sawi.

Khawvela healhcare scheme lian ber tur, Pradhan Mantri Jan Arogya Abhiyaan (Ayushman Bharat) chuan mi vaibelchhe 50 a huam tur thu sawiin, heng mite hi kum khatah damdawi lama inenkawlna cheng nuai 5 hu thleng pek theih an ni dawn tih a sawi.

PM chuan India ram mipui zawng zawng tan intluktlanna thlentir chu a duh ber a ni tih sawiin, chenna in, electricity, tui leh khawsakna atana mamawh hrang hrangte chu mipuiten in ang tlang veka an hmuh theih a duh thu a sawi bawk.

NDA sorkar chuan ram ṭhatna turin thutlukna harsa leh khirh tak tak pawh siam a hlau lo tih sawiin, Modi chuan loneitute tana MSP siam leh GST hman chungchangte a sawilang. Sorkar hmasa lamten thutlukna mumal an siam theih loh avanga ramin harsatna a tawh ṭhin lak aṭangin a kaihhruai sorkar chuan bung thar a kaipui tih a sawi bawk. Dalit leh hnam hnufual dangte chawikana tura sorkarin a hmalakna te a sawilang bawk a ni.

Modi chuan hmeichhiate chungchanga rilru zim tak put ṭhin chu tihtawp a hun tih sawiin, dik taka rorelna kalpui a nih tur thu a sawi. Pawngsualna tenawm tak thleng ṭhin lakah ram chu a fihlim a ngai tih sawiin, tunhnaiah Madhya Pradesh-ah fast track court-in pawngsualtu a khaihlum a, hei hi mipuiten an hriat a pawimawh a ni, a ti. Dan a lal ber a, tumahin anmahni thu leh duhdan angin dan an lekkawh tur a ni lo, a ti.

Jammu and Kashmir chungchang pawh sawichhuakin, PM Modi chuan J&K tualchhung buaina chu silai mu leh inrikrapna hmanga chinfel theih a ni lo, a ti. Kashmir buaina chu Kashmir mipuite dinhmun hriatpui a, anmahni chana indahin chinfel theih chauh a ni ang, a ti. NDA sorkar chuan ramchhunga Muslim majority state awmchhun, Jammu and Kashmir-a hmasawnna hrang hrang kalpuina turin theihtawp a chhuah zel tih a sawi bawk.

Modi hian a hmain I-Day lawmnaa a thu sawi turah mipuite chu rawtna an neihte thehlut turin a lo sawm tawh a ni. MyGov.in a thehluh zingah hian pawngsual, open defecation, reservation system leh education chungchangte sawi tura rawtna thehluh eng emaw zat a awm a ni.

Delhi-a I-Day lawmna atan hian venhimna khauh taka kalpui a ni a, khawpui chhungah Delhi Police 70,000 dawn duty tir an ni a, heng zinga 10,000 vel chu Red Fort chhehvelah hian dah an ni. Hei bakah hian Red Fort panna kawngah hian CCTV camera 500 dah a ni bawk. Red Fort-ah bik hian NSG sniper leh commando special team te dah an ni bawk a, Red Fort ep-a building hrang hrangte chu police leh parmilitary force-ten an veng a ni.