Tuilian vangin Cochin Airport khar

Kerala state-a ruahsur nasa vanga tuilianin Cochin International Airport runway a chim avangin airport hi Inrinni thleng khar a ni dawn. Heng ni li chhung atana airport khar a nih ṭum khatna a ni.

Nimin zing khan airport hian flight zawng zawng chu chawhnu dar hnih thleng titlaiin, flight tam zawk chu Thiruvananthapuram leh Kozhikode airport lamah kal tir an ni.

Kerala state hmun hrang hrangah ruah a la sur chhunzawm reng a, Cochin International Airport hi Periyar lui bula awm niin lui tui lian hian runway hi a chim tel a ni. Idduki-a dam tam zawka tuite chu he luiah hian an luang lut a ni. Thawhlehni zan khan tui tam avangin Idamlayar, Idukki leh Mullaperiyar dam shutter-te hawn an ni leh a, hengte nen hian tui paihchhuahna turin state chhunga dam 33 shutter te chu hawn an ni tawh.

State sorkar chuan tuilian tuarte chhanchhuah leh chhawmdawl hna thawk turin sipai leh National Disaster Response Force (NDRF) tam zawk tir lut turin a ngen tawh bawk. State chhunga district 14 zinga 12-ah chuan tuilian vanga harsatna thleng mai thei laka fimkhur tur leh inralring tura hriattirna tihchhuah a ni tawh bawk.

Official-te chuan ruahsur nasain tuilian leh leimin a thlen vanga thi hi mi 40 an tling tawh niin an sawi a, chin hriat lohin mi eng emaw zat an awm bawk.