Symptom nei lo leh 'high risk' ni lo Positive contact-te in test kher ngai lo

Indian Council of Medical Research (ICMR) chuan Thawhṭannia Covid-19 hri leng chungchanga inkaihhruaina dan a tihchhuah tharah, Covid-19 positive contact zingah kum 60 chunglam leh natna benvawn nei, 'high risk' ni lo leh symptom nei lote chu an in test ve kher a ngai lo, a ti.

ICMR Advisory on Purposive Testing Strategy for Covid-19 chuan ram pawm lam aṭanga rawn lut ni lo, ram chhunga zinkualte pawh test kher an ngai lo tih a sawi bawk. Mahse ram pawn aṭanga rawn lutte erawh test zel tur an la nih bakah, ni sarih chhung inkhunghran tura tih an ni a, a ni riatnaah PT-PCR test an neih a ngai bawk.

Hri kai zinga 5-10% damdawi-ina dah ngai
India rama hri leng thar leh mekah, hri kai zinga 5-10% chu damdawi-in panpui ngai an ni.

Health and family welfare department secretary Rajesh Bhushan chuan nikuma hri leng thawh hnihna thlen lai khan hri kai zinga 20-23% vel chu damdawi-in panpui ngai an ni tih a sawi. "Tunah erawh chuan hri kai zinga 5-10% vel hi damdawi-in panpui ngai an ni rih. Mahse boruak inthlak danglam zel avangin damdawi-in panpui ngai pawh hi a danglam leh vat thei a ni," a ti.

State leh UT tinte chu hri kai mek awm zat, home isolation, damdawi-in awm, oxygen bed hman ngai, ICU-a dah leh ventilator hman ngai zatte chu nitin uluk taka thlithlai ziah turin chah an ni.

Delhi private office-te in lama thawk turin hriattir
Delhi Disaster Management Authority (DDMA) in thuchhuah a siam tharah, private office-te chu an hnathawkte in lam aṭanga hna thawh tir vek turin a ti. Essential service bikte erawh a huam tel lo ang.

Sorkar office-te chu thawktu 50% chin kal tir an ni thung.

Thawhṭanni aṭang khan Delhi khawpuia bar leh restaurant-te chu khar tir an ni a, ei tur pek chhuah chauh phalsak an ni.

Delhi health minister Satyendar Jain chuan khawpui chhunga hri leng thar hi tunkar chhungin a 'peak' a thlen a rinawm thu sawiin, kar leh lam aṭang chuan hri kai thar an tlakhniam tawh an ring tih a sawi.