CAA Rules siamna turin hun pekbelh dil leh

Union home ministry chuan Citizenship (Amendment) Act (CAA), 2019 rules siamna turin Rajya Sabha leh Lok Sabha-a parliamentary commitee hnenah hun pek belh turin a dil leh a, ṭum ruk hun pek belh tura a dilna a ni.

CAA hi pass ni tawh mah se rules siam phawt loh chuan hman theih a la ni lo.

Home ministry official chuan parliamentary committee-te hnena hun pek belh tura an dil thu leh, an remtih sak ngei a beisei thu a sawi.

Sawisel leh dodalna nasa tak karah kum 2019, December 11 khan Parliament chuan CAA hi a pass a, a tukah President-in a pawmpui zui nghal a ni. Ram chhung hmun hrang hrangah he dan duhlohna hi lantir zui a ni.

Home Ministry hian CAA pass a nih aṭanga thla ruk chhungin rules a siam hman loh avangin a ṭum khatna atan June, 2020 khan committee hnenah hun pek belh a dil a, a hnuah pawh dil belh zelin ṭum nga pawhseisakna chu Thawhṭanni khan a tawp a ni. Mahse hemi chhung pawhin a la siam fel hman loh avangin hun a dil belh leh ta a ni.

CAA hnuaiah hian Pakistan, Bangladesh leh Afghanistan aṭanga kum 2014, December 31 hma lama India-a rawn lut Hindu, Sikh, Jain, Bhuddisst, Parsis leh Kristian-te chu India khua leh tui nihna pek theih an ni dawn. Mahse he dan hian Muslim-te a huam tel loh avangin sawisel a hlawh hle.