Ni ruk chhung hri kai thar 50,000 hnuai lam ni tawh

India ramah nitina Covid-19 kai hmuh chhuah thar chu ni ruk chhung mi 50,000 hnuai lam zel an ni tawh. Ni 41 chhung chu nitina hri kai hmuh thar aiin enkawl dam an tam tawh zawk bawk a ni.

Ningani khan hri kai hmuh thar hi mi 44,879 awmin, Covid-19 vanga thi mi 547 an awm. Hemi ni vek hian hri kai enkawl dam mi 49,079 an awm bawk.

Union ministry of health and family welfare tarlan danin, ram pumah hri kai hmuh tawh hi mi 8,728,795 tling tawhin, an zinga 81,15,580 chu enkawl dam an ni tawh. Covid-19 vanga thi hi India ramah mi 1,28,668 an awm tawh a ni.

Ram pumah hri kai hmuh chhuah thar tlahniam zel mah se, India ram khawpui Delhi-ah erawh hri kai an la pung chak hle. Ningani bik khan Delhi-ah hri kai hmuh thar mi 7,053 awmin, mi 104 an thi a, hripui vanga ni khata thi an tam ber ni a thleng.

Delhi-a hri kai hmuh tawh hi mi 4,67,028 tling tawhin, an zinga 7,332 in an thihpui tawh a ni. November 1-11 chhung khan Delhi-a Covid-19 vanga thi hi mi 768 an tling a, October thla chhung khan hripui thihpui mi 1,124 an awm bawk.

Chief minister Arvind Kejriwal chuan Delhi khawpuia hri darh mek chu ni 7-10 chhunga an thunun theih a beisei thu a sawi. Hri darh venna kawngah theihtawpin hma an lak zel thu a sawi a, hri darh zualna chhan pakhat chu air pollution nasat vang niin a sawi.

China customs office chuan India ram aṭanga sangha, frozen cuttlefish a lakluhah Covid-19 hrik hmuh a nih thu sawiin, kar khat chhung sangha lakluh hi a titawp rih dawn tih a sawi.

General Administration of Customs chuan thuchhuah a siamah, frozen cuttlefish pack pathum sample an endiknaah hri hi hmuh a nih thu a sawi a, hei vang hian Kolkata-a seafood export company, Basu International aṭanga sangha lakluh chu kar khat chhung atan tihtawp rih a nih thu a sawi a ni. 

Maharashtra state task force on Covid-19 member, Indian College of Physicians dean, Dr Shashank Joshi chuan hripui leng vanga inkharkhipna kalpui chuan diabetes patient-te ah nghawng ṭha lo tak a neih a hlauhthawnthu a sawi. 

Dr Joshi chuan lockdown chhungin diabetes patient tam takin an damdawi ei dan turte an zawm ṭha thei lo a, an sugar level check turin exercise an la ṭha thei lo fo tih a sawi. Hei hian nghawng ṭha lo tak a neih a hlauhthawn thu sawiin, "Covid-19 leng vanga inkharkhipna kalpui hian diabetes case leh blood sugar level  san phah tam tak an punchhoh phah kan ring a ni," a ti. 

Maharashtra sorkar chuan nakkum January-February thla hian an state-ah hri leng thawh hnihna hi a thlen a rinawm thu sawiin, hemi atana theihtawpa inbuatsaih turin thuneitute an hriattir. Test tam zawk neih a nih theihna atan district leh municipal corporation tinah laboratory hman tlak a awm tur a ni tih a sawi.