India-in ASEAN Response Fund atan US dollar mtd 1 thawh

Prime minister Narendra Modi chuan nimin aṭanga neih ṭan ASEAN summit vawi 17-naah India-in Covid-19 ASEAN Response Fund atan US dollar maktaduai khat a thawh dawn tih a puang.

Summit-ah hian PM Modi chuan India-in ram hrang hrangte a puihna chungchang thute sawi chhuakin, ASEAN member ram 10-ten Covid-19 an dona kawnga an hmalaknate chu ṭha a tih thu a sawi. India leh ASEAN ramte chu tun aia nasa zawka kawng hrang hranga an inpawhtlan theih nana hmalakna atan Modi chuan India-in US dollar vaibelchhe khat chu Line of Credit-ah dah a tum thu a sawi bawk.

India leh ASEAN chu hmanlai thil (historical), ram leilung (geogra-phical) leh hnam zia thil (cultural) vanga inkungkaihna neih ṭha a nih thu Modi chuan sawiin, ASEAN member ramte chu India foreign policy zinga mi Act East policy tana nodal centre an nih thu pawh a sawi. India-in Indo Pacific Ocean-a hmalakna a neihte leh ASEAN-in Indo Pacific-a a hmalaknaah inpumkhatna ṭha zawk a awm theihna atana ṭang ho turin Modi chuan member ramte a sawm a ni. Hemi hmang hian India leh ASEAN ramte chu security chungchangah pawh hma an sawn phah zel a rin thu Modi chuan a sawi. 

Summit neih chung-changah hian ministry of external affairs (MEA) chuan thuchhuah siamin, India-in plan a siam "ASEAN-India Plan of Action for 2021-2025" chu ram hruaitute hian an pawm tlan thu tarlan a ni. Nimina summit neihah hian South China Sea leh firfiakte chetna hrang hrangte chu sawiho a ni bawk. 

ASEAN summit vawi 17-na hi November 13-15 inkar chhung neih tur a ni a, he summit hi Vietnam chuan a thleng a ni.