PM hlui Vajpayee vuiliam a ni ta

Prime Minister hlui Atal Bihari Vajpayee chu nimin tlai dar 4 khan New Delhi-a Rashtriya Smriti Sthal, Vijay Ghat-ah state chawimawina famkim nen vuiliam a ni ta. A ruang hi Yamuna lui kamah halral a ni.

Sorkar laipui chuan PM hlui Vajpayee hi sunna atan nimin khan state tam zawkah chawlh a puang a, sorkar laipui chuan ni sarih chhung sun a nih tur thu a sawi bawk. Hemi chhung hian hnam puanzar chu a ngul chanveah zar a ni ang.

Kum 93 mi, Vajyapee hi hun rei tak a damloh hnuah Ningani tlai dar 5.05 khan New Delhi-a All India Institute of Medical Sciences (AIIMS)-ah a thi a ni. PM hlui hian kum 2009 khan stroke a neih vangin a hriselna dinhmun a ṭha lo chho a, a stroke hnu hian dementia a nei zui bawk. Kumin June 11 khan awmna, kidney infection, urinary tract infection leh natna dang dang a neih vangin AIIMS-ah dahluh a ni. Nilaini zan aṭang khan a dinhmun hi tla hniam a, khawl hmanga thawk tir niin Ningani tlai dar 5.05 khan a thi ta a ni.

Damdawiina a awm chhung hian Vajpayee hi hruaitu hrang hrangten an tlawh a, Prime Minister Narendra Modi leh cabinet minister eng emaw zat bakah, Congress party president Rahul Gandhi, Bihar Chief Minister Nitish Kumar leh mi pawimawh dangten an tlawh a ni.

Atal Bihari Vajpayee hian Prime Minister dinhmun hi kum 1996, 1998 leh 1999 te khan term thum a chelh hman a, non-Congress, non-Gandhi zingah PM term, kum nga chelh tluan thei hmasa ber a ni. Bharatiya Janata Party founding member zingah a tel. Nupui a nei lo a, mahse a ṭhian Rajkumari Kaul leh BN Kau-te fanu, Namita Bhattacharya chu a fa atan a la.

Vajpayee hian chawimawina hrang hrang pawh a lo dawng tawh a, kum 2014, December 25 khan India civil mi chawimawina sang ber Bharat Ratna chu Prime Minister Narendra Modi-a kaihhruai NDA sorkar chuan a hlan. He chawimawina hi hetihlaia President, Pranab Mukherjee chuan Vajpayee hi a chenna inah a hlan. Kum 1992-ah Padma Vibhushan, 1994-ah Lokmanya Tilak Award, 1994-ah Outstanding Parliamentarian Award leh Bharat Ratna Pandit Govind Vallabh Patna Award leh 2015-ah Bangladesh Liberation War Honour-te a dawng bawk.

Vajpayee ruang hi darthlalang kuangah dahin kuang hi hnam puanzarin tuam a ni. Ningani zan khan AIIMS aṭang hian Krishna Menon Marg-a a bungalow-ah lak niin zan riahpui a ni. Zing dar 7:30 - 8:30 inkar khan amah thlah duhtute tan tlawhna hun siam a ni. Zing dar 9 vel khan a ruang hi Deen Dayal Upadhyay Marg-a BJP headquarters-ah lak a ni leh a, mi tam takin an zui a ni. Hetaṭang hian chawhnu dar 1 khan a vuina tur hmun, Smriti Sthal panpui a ni. Smriti Sthal hi PM hlui Jawaharlal Nehru-a hriatrengna, Shanti Van leh Lal Bahadur Srstri-a hriatrengna hmun, Vijay Ghat inkara awm a ni. Kum 2012 December thla khan he hmunah vek hian PM hlui IK Gujral chu vui a lo ni tawh a ni.

Vajpayee vuinaa tel tur hian ramdang hruaitu eng emaw zat an rawn kal a, an zingah hian Bhutan lal, Jigme Khesar Namgyel Wangchuk pawh a tel. Afghanistan President hlui Hamid Karzai, Nepal Foreign Affairs Minister Pradeep Kumar Gyawali, Sri Lanka Acting Foreign Minister Laskhman Kiriella, Bangladesh Foreign Minister Abul Hassan Mahmood Ali leh Pakistan Law Minister Ali Zafar-te pawhin nimin khan Delhi an rawn thleng a ni.

Hruaitu hrang hrangten an ui
Thusawi thiam leh rorel thiam, prime minister ni tawh zinga mipute ngaihnat hlawh ber zinga mi, Atal Bihari Vajpayee hi political hruaitu hrang hrangten an ui thu an sawi.

President Ram Nath Kovind chuan Vajpayee chu rorel thiam, hruaitu hmathlir nei ṭha, mi puitling leh thusawi thiam a ni tih sawiin, mitin an uiin an ngai dawn hle tih a sawi.

Vice President Venkaiah Naidu pawhin India-in zalenna a hmuh hnuah hruaitu ropui ber a ni, a ti. Prime Minister Narendra Modi chuan Vajpayee chu India chuan a sun takzet a ni tih sawiin, ram tan a nung a, kum rei tak chhung ṭhahnemngai takin a thawk a ni, a ti.

Congress president Rahul Gandhi pawhin India chuan a fapa ropui tak a chan ta a ni tiin, Vajpayee chu India mipuite ngainat leh zah a ni, a ti.

PM hlui Manmohan Singh pawhin thusawi thiam, poet ṭha tak, mipui rawngbawltu ṭha leh parliamentarian ropui a ni tiin Vajpayee chu a sawi.

Atal Bihari Vajpayee :
q Kum 1924, December 25-ah Gwalior, Uttar Pradesh-ah a piang.
q Gwalior-a Victoria College aṭangin a graduate a, Kanpur-a DAV College aṭangin MA political science a zo.
q Rawlthar a nih laiin British colonial rule a dodal avangin jail-ah tantir a ni tawh. A hnu kum 1947-ah Rashtriya Swayamsevak Sangh (RSS) a zawm.
q Kum 1950 chhoah RSS magazine a enkawl duh vangin law school a chawlhsan.
q Kum 1942-1945-a Quit India Movement-ah khan a tel. Bharatiya Jana Sangh dintu Syama Prasad Mookerjee a hnung a zui a, party north India in-charge secretary atan dah a ni.
q Kum 1957 khan a ṭum khatna atan Parliament member-ah thlan tlin a ni
q Lok Sabha-ah kum 1957 aṭanga 2009 chhung khan term 10 chhung leh, Rajya Sabha member atan term hnih thlan tlin a ni.
q Congress party ni lo zingah PM term, kum nga hmang tluan thei hmasa ber a ni.
q Kum 1996-ah ni 13 chhung PM a ni a, kum 1998 khan thla 13 chhung PM a ni leh bawk. Kum 1999 khan a PM term thumna chelhin, a term hi a hmang tluan a ni.