PM-in Kerala a tlawh

Prime Minister Narendra Modi chaun tuilian vanga harsatna tawk mek, Kerala chu nimin khan a tlawh.

PM Modi hian nimina PM hlui Atal Bihari Vajpayee vuiliam a nih hnuah Kerala lam hi a pan a, Kochi-ah zan riakin vawiin hian thlawhtheihna hmangin tuilenna hmun hrang hrangte a enkual ang. PM hian a hmain Kerala Chief Minister Pinarayi Vijayan chu biain, an state-in harsatna an tawh mekah sorkar laipui chuan theihtawpa a puih zel tur thu a lo hrilh tawh a ni. Defence ministry hnenah pawh tuilian tuarte chhanchhuah hna chu chak zawka kalpui turin a lo hrilh tawh bawk.

August 8 aṭang khan Kerala-ah hian ruahsur nasa vanga tuilian leh leimin thlengah mi 164 in nunna an chan tawh a, air, rel leh road traffic thlengin hmun tam takah a khaihlak phah a ni. Ruah hi a la sur chhunzawm zel dawn nia sawi a ni.

Union home minister Rajnath Singh chuan August 12 khan tuilenna hmunte hi a lo endik tawh bawk a, state sorkarin tuilian tuarte chhawmdawlna hna a thawh meka puihna turin sorkar laipuiin cheng vaibelchhe 100 a pek tur thu a puang a ni.

Tuilian tuarte mi nuai 1.5 chuang chu state chhung hmun hrang hrangah relief camp 1,200 siamah an khawsa mek a ni. Tuilian tuarte ṭanpui hna thawk tur hian Army, Navy leh Air Force contingent eng emaw zat tirh an nih bakah National Disaster Response Force (NDRF) team 12 tirh belh an ni a, team dang 23 pawh tirh leh thuai an ni dawn tih NDRF Director-General Sanjay Kumar chuan a sawi.