District 120-ah weekly positivity rate 10% tling

India rama Covid-19 hri leng thawh thumna thleng mekah, state leh union territory 29-a district 120-ah kar khata hri kai thar, weekly positivity rate chu 10% chunglam an ni mek.

Kum 2021, December 24 khan ram chhunga district zingah weekly positivity rate 10% tling hi district pahnih chauh a ni hman a, January 6-ah district 41-ah kai chhoin, district hrang hrangah hri kai thar zat hi an pung chho chak leh tawh hle a ni.

Thawhlehni khan ram pumah hri kai thar hi nuai hnih dawn a tling chho leh tawh a, hri kai hmuh chhuah thar mi 1,94,720 an awm leh a, ni li chhung chu a zawnin hri kai thar hi nuai 1.5 chunglam an awm leh tawh.

Ram pumah nitina hri kai thar zat, daily positivity rate chu 11.05% tling tawhin, hri kai mek pawh 9,55,319 an kai chho a, Omicron variant kai hmuh chhuah pawh 4,868 an awm tawh bawk.

State leh UT 28-ah Omicron variant kai hi hmuh chhuah an awm tawh a, Maharashtra-ah tam berin mi 1,281 an awm a, Rajasthan-ah 645, Delhi-ah 546, Karnataka-ah 479 leh Kerala-ah 350 an awm tawh a ni.

Covid-19 vaccine pek chhuah pawh ngawrh taka kalpui chhunzawm zel a ni a, dose vaibelchhe 153.80 pek chhuah a ni tawh. State/UT hrang hrangah vaccine hman loh hi dose vaibelchhe 16.50 a la awm tih ministry of health and family welfare chuan a tarlang.

Ni 7 chhungin hri vanga thi zat 70% in pung
Ram pumah hri kai punna hi kar hmasa lam aiin a tlahniam deuh a, mahse ni sarih liam ta chhunga hri vanga thi punna hi 70% a tling thung.

Hri leng thawh hnihna thlen lai aiin ni khata hri vanga thi zat hi a la tlem hle thung a, mahse a punna erawh a sang chak hle thung. Ni sarih liam ta chhung khan hripui vanga thi 866 awmin, a hma ni sarih chhunga thi zat 511 aṭangin a punna hi 70% a tling a ni.