UP-a BJP minister leh MLA 4 bang

Assembly inthlan hmabak, Uttar Pradesh-a rorellai BJP MLA pali leh minister pakhat an bang.

Uttar Pradesh chief minister Yogi Adityanath kaihhruai sorkara minister pawimawh, Swami Prasad Maurya chuan a twitter-ah a ban thu hi a puang a, a hnu lawkah BJP MLA dang pali - Roshan Lal Verma, Brijesh Prajapati, Bhagwati Sagar leh Vinay Shakya-te pawhin an ban thu an puang zui ve leh a ni.

Swami Prasad Maurya hi OBC hruaitu thiltithei tak, MLA term nga lo ni tawh a ni a, kum 2016 khan Maywati-i party, Bahujan Samaj Party (BSP) chhuahsanin BJP a zawm a ni. BJP-in OBC voter-te a huina kawngah pawh mi pawimawh tak a ni.

Banna lehkha a thehluah Maurya chuan, "Ka theihtawp chhuahin Yogi Adityanath hnuaiah hian ka thawk a ni. Mahse Dalit, OBC, loneitu, hna nei lo leh sumdawng tenau zawkte rahbeh an nih avangin ka bang ta a ni, " a ti. Maurya hian thla hnih liam ta khan union home minister Amit Shah hnenah Yogi Adityanath chungchangah complaint pawh lo nei tawh a, mahse ngaihsak a hlawh zui lo nia sawi a ni. Banna a thehluh hnuah Amit Shah chuan deputy chief minister Keshav Prasad Maurya chu Maurya leh a thurualpuite hi thlem lungawi dan ngaihtuah turin a ti a, Keshav Prasad Maurya pawhin Swami Prasad Maurya banna chhan chu hre lo mah se, thutlukna siam hmanhmawh lo a, inbiakna neihpui turin a sawm nghal a ni.