Kerala : Tuilian vanga thi mi 370 an tling tawh

Kerala state-a tuilian vanga thi chu nimin thleng khan mi 370 an tling tawh a, ruah hi a la sur belh zel dawn nia sawi a ni.

State chhung hmun hrang hrangah tuilian tuar mi 58,000 chhanchhuah an ni tawh. Mi nuai ruk chuang chu relief camp 3,000-ah an khawsa mek bawk. Ruah a la sur chhunzawm dawn nia sawi ni mah se, thuneitute chuan district hrang hranga red alert an tihchhuah erawh an sut tawh a ni.

Tuilian tuarte ṭanpui leh chhanchhuah hna hi ngawrh taka thawh chhunzawm zel a ni. Chhanchhuah hna hi Army, Indian Air Force (IAF) leh National Disaster Response Force (NDRF) ten an thawk a ni. Chhanchhuah hna thawhna atana hman, lawng pakhat leh thawktu mi paruk chu Inrinni zan khan Pananad area-ah chin hriat lohin an bo. Chhanchhuah hna thawhna atan hian helicopter 67 , aeroplanes 24 leh motorboat 548 zet hman a ni.

Chengannur, Pandalam, Thiruvalla leh Pathanamthitta district-a hmun tam tak bakah Ernakulam-a Aluva, Angamaly leh Paravur te chu tuilian vang hian tlawh pawh theih loha awmin, ni thum chhung ei tur leh tui thianghlim in tur nei mumal loin an awm a ni. Official-te chuan hmun tam takah ei tur an tlakchham ṭan thu leh, power supply an neih loh thu an sawi. Thuneitute chuan tuilian vang hian hri a len an hlauhthawn thu an sawi bawk.

Inrinni thleng khan tuilian tuarte tan hian sorkar laipui chuan food packet 300,000, bawnghnute MT 600,000, tui thianghlim litre 1,400,000 leh tui tihthianghlimna hmanrua 150 a pe tawh. Telecom operator-te pawhin state pumah call, message leh data service-te a thlawn veka pek an ni dawn tih an sawi bawk a ni.

Kerala-a tuilian hian thlai chinna ram hectare 40,000 chuanga zau a chim chhe tawh a, chenna in 1,000 chuang chu luah tlak loha a chhiat bakah, in dang 26,000 pawh an chhe tel bawk niin an sawi. Lei 134 leh, kawng km 16,000 zeta thui chu tuilian hian a tichhe tawh bawk. Tuilianin thil a tihchhiat hlutzawng hi cheng vaibelchhe 21,000 a tling tawh a ni.