Atal Pension Yojana social security scheme a hlawhtling lo

Sorkar laipuiin Prime Minister hlui Atal Bihari Vajpayee hming chawia social security scheme a siam, Atal Pension Yojana (APY) chu a hlawhtling lo hle.

He scheme hi unorganised sector-a employment security nei lo tana duan a ni a, a target hi mi vaibelchhe 40 a nih laiin, kumin July thla thleng khan he scheme hmang duh hi mi vaibelchhe 1.08 an la awm.

APY hnuaiah hian subscriber-te chu an sum thawh dan azirin kum 60 an tlinnaah pension, thla khata Rs 1,000 aṭanga Rs 5,000 thleng la thei tura tih an ni. Mahse scheme hian ngaihven a hlawh ṭhat loh vangin sorkar laipui chuan pension hi Rs 5,000 aṭanga Rs 10,000 thlengin a tisang leh a ni.

Kum 2015 khan BJP kaihhruai NDA sorkar chuan APY hi hnathawktu mi rethei zawkten an hna an aṭanga an chawlh hnua pension an lak ve theihna tura duangin a tlangzarh a ni. He scheme hi hnathawktu mi vaibelchhe 47.29 te huam tura duan a ni.

Official-te chuan bank hrang hrangte chu he scheme hnuaiah a thawh khatna atan kum 2015, December 31 khan subscriber mi vaibelchhe 2 ziak lut hman turin target an siam a, mahse June 2015-March 2016 chhung khan mi nuai 24.60 inziaklutin, a kum lehah a tlahniam zui a, mi 23,93,515 chauh an inziaklut a ni. Sorkarin nasa taka hma a lak hnuah 2017-2018 khan an pungchho leh deuh a, mi 48,50,205 an inziak lut. Kumin July thleng khan nuai 10.50 ziahluh an ni tawh a, mahse sorkarin a target vaibelchhe 2 chu an la pha lo hle.