Zan dar 9 hnuah ATM-ah pawisa dah tawh dawn lo

Union home ministry chuan nakkum aṭangin ram chhunga ATM hrang hrangah khawpuiah zan dar 9 leh rural area-ah zan dar 6 hnuah pawisa dahbelh a ni tawh dawn lo tih a sawi.

Home Ministry thuchhuah chuan, Standard Operating Procedures (SoPs) thar chu nakkum February 8 aṭanga hman ṭan a ni dawn tih a sawi. Hei ruahmanna thar hi pawisa ruk tum vanga ATM, cash van leh cash vault beih a nih ṭhin vanga siam a ni.

Ramchhungah hian non-bank private agency-te enkawl cash van 8,000 chuang an awm a, hengte hian nitin bank ho pawisa cheng vaibelchhe 15,000 chuang an phur kual ṭhin a ni. A chang chuan private agency-te hian an pawisa phurhte hi an cash vault-ah zan an riah tir ṭhin.

Ministry chuan, kumthar aṭang chuan urban area-ah zan dar 9 hnuah ATM-a pawisa dah luh emaw pawisa phurhkual emaw hi phal a ni tawh dawn lo a, rural area-ah zan dar 6 thleng niin, helho hluarna bialah te chuan tlai dar 4 hnu lamah khap a ni dawn bawk tih a sawi.

Agency-te chuan pawisa phurtu motor-ah chuan armed security guard pahnih, ATM officer pahnih tal an kal tel tir a ngai dawn bawk. Armed guard pakhat chu a hmaah, driver bulah ṭhuin pakhat zawk chu a hnung lamah a ṭhu thung ang. Motor aṭanga pawisa lakchhuah emaw, pawisa dahluh emaw laia an kalsawn lawk dawn a nih pawhin armed guard pakhat tal chu motor-ah a awm reng tur tih a ni bawk. Hei bakah hian cash van-te chu CCTV system dah vek tura tih an ni.