Kerala : Relief camp-ah mi nuai 8 chuang awm ; Pope-in Kerala mipuite ṭanpui turin ngen sak

Kerala state-in ruahsur nasa avanga tuilian leh leimin a tawh chuan ziaawm lam a la pan lo a, chhiatna thleng avanga thi chu mi 370 an tling tawh a, state chhung hmun hrang hranga relief camp 3,700-ah mi 845,000 an khawsa mek.

Tuilian tuarte chhanchhuah hna hi helicopter, aircraft leh motorboat ṭhahnem tham tak hmangin Navy, Army leh Air Force sipaite chuan an thawk a, NDRF team ten an pui bawk. Rilief commissioner PH Kurian chuan kar kalta Inrinni khan tuilian tuar mi sang tel chu hmun him lamah hruaichhuah an ni thu a sawi a, he tihlai hian hmun tam tak chu tuilian hian ala chim chhunzawm zel thu a sawi bawk.

Health ministry chu tuilian a kam ve leha emegency medical team te tirh nghal tumin an inbuatsaih mek. Health official-te chuan tui bawlhhlawh aṭang hian natna inkaichhawn theih hri a len a hlauhthawnawm hle niin an sawi.

Chief Minister Pinarayi Vijayan chuan an state-a tuilian leh leiminin chhiatna hrang hrang a thlen avanga an sum hloh chu cheng tluklehdingawn 195.12 a tling tawh niin a tarlang.

Union Ministry of Health and Family Welfare chuan Kerala sorkarin a ngen angin damdawi chi 90 zet chu an ngen ang zat a thawn tawh tih a sawi a, heng damdawi-te hian nimin khan Kerala a thleng a ni. Ministry chuan state dangten Kerala tuilian tuarte tana damdawi an thawn duh a nih pawhin a thawhpui tur thu leh, ruahmanna pawh alo siamsak tur thu a sawi. Tunah chuan hri leng a awm hriat ni lo mah se, tuilian a kam chhoh ṭan hunah hri hi a len a hlauhawm chho dawn niin an sawi. Hei vang hian state sorkar hnenah hri len hlauhthawnawmna hmunte chu uluk taka vil reng turin an hriatti thu a sawi.

Food Processing Minister Harsimrat Kaur Badal chuan ramchhunga food processing industry-te hnenah an ei tur siamte chu phal taka tuilian tuarte tana thawh turin a ngen. Badal chuan thuchhuah siami, tuilian vang hian mi tam takin an chenna in an chan a, ei tur an mamawh hle a ni, a ti. Food Processing Ministry chuan hemi kawnga an hmalakna buaipui tur hian officer pahnih dahin, heng officer-te hian industry-te chuan biain, an thawh theih zat te an hrilh thei ang, a ti. Minister chuan a ngen avangin ITC leh Britannia chuan Kerala sorkar hnenah biscuit packet nuai thum an pe tawh bawk niin a sawi.

Catholic Kohhran hotu, Pope Francis chuan Pathianni khan Kerala-a tuilian tuar mekte ṭanpui turin a ngensak a, Kerala chuan chhiatna nasa tak an tuar mek a ni, a ti. Pope hian St Peter's Square-ah tuilian tuarte tan hian a ṭawngṭai sak nghak a ni. Kerala-a Catholic Kohhran nena inpawhna ṭha tak an neih thu sawiin, chhawmdawlna hna thawhna kawnga hmahruaitu a ni, a ti.

State hrang hrangin ṭanpuina pe

Kerala tuilian tuarte ṭanpuina tur hi ram chhung hmun hrang hrangin an dawng a, nimin khan chhawmdawlna tur eng emaw zatin state an thleng. Official te chuan nimin khan Mumbai aṭangin tuilian tuarte tana thawn, tuithianghlim ton 800 leh an mamawh dang ton 18 dawn phurtu Navy lawnglian INS Deepak chuan Cochin port a thleng. Hengte hi a mamawhtute hnenah semdarh turin truck hmanga phurh chhuah nghal an ni. Hei bakah Kerala fuel mamawh phurhukna turin Mumbai aṭangin crude oil MT 50000 phurtu pawh Cochin port lamah kaltir a ni bawk.

Prime Minister Narendra Modi chuan tuilian tuarte ṭanpuina tur hian Rs. vaibelchhel 500 pek a nih tur thu an puang a, hemi hma hian Home Minister Rajnath Singh chuan Rs vbch 100 pek an nih tur thu a lo sawi tawh bawk. CM Vijayan chuan a mimal sum Rs nuai khat chu Chief Minister Distress Relief Fund-ah a pe a; minister, official leh celebrity hrang hrangte pawhin sum an thawh bawk.

Delhi Chief Minister Arvind Kejriwal chuan Kerala ṭanpuina atan Rs vbch 10 a pek bakah, AAP MLA leh MP-te'n an thla khat hlawh an pek vek tur thu a sawi. Congress MP leh MLA-te pawhin thla khat hlawh an pe dawn bawk.

Bihar Chief Minister Nitish Kumar chuan Rs vbch 10 an pe dawn tih a puang a, Odisha CM Naveen Patnaik pawhin Rs vbch 5 an pek hnuah, Rs vbch 5 dang an pekbelh leh dawn tih a puang. Hei bakah hian chhanchhuah hna thawhnaa pui turin firemen 245 leh lawng an tir bawk.

State hrang hrang chief minister-te chuan Kerala tuilian tuarte ṭanpuina an pek tur thu hi an puang. Tamil Nadu-in Rs vbch 10, Andhra Pradesh-in Rs vbch 10, Puducherry-in Rs vbch 1, Jharkhand-in Rs vbch 5, Maharashtra-in Rs vbch 20, Gujarat-in Rs vbch 10, Punjab-in Rs vbch 10, Telangana-in Rs vbch 25, Bihar-in Rs vbch 10, Himachal Pradesh-in Rs vbch 5, Uttarakhand-in Rs vbch 5, Chattisgarh-in Rs vbch 3, Madhya Pradesh-in Rs vbch 10, Jammu and Kashmir-in Rs vbch 2, Karnataka-in Rs vbch 10, West Bengal-in Rs vbch 10 an pe dawn tih an puang. Hmarchhak state-te pawhin ṭanpuina hi an pe bawk.

Heng bakah hian ramchhunga khawpui hrang hrangah donation camp siam a ni bawk.