Sorkar laipuin Kerala tuilian 'chhiatna nasa'-ah a puansak

Sorkar laipui chuan Kerala state-in tuilian a tawrh mek chu 'chhiatna nasa'-ah (severe calamity) a puansak. Hetianga a puansak avang hian state sorkar hian sorkar laipui aṭanga puina leh chhawmdawlna tam zawk a dawn theih phah dawn a ni.

Chief Minister Pinaray Vijayan chuan an state-in tuilian vanga chhiatna an tawh mek chu mi hrang hrangin rampum chhiatna, national calamity-a puansak turin sorkar laipui chu an duh a, anmahni ngei pawhin an ngen niin a sawi. Mahse sorkar laipui chuan rampum chhiatna anga puansak tur chuan harsatna a awm tih sawiin, 'chhiatna nasa' tak thlengah a puansak ta zawk a ni, a ti. Sorkar laipuiin a puansak tak avang hian ṭanpuina an dawna theihna turin an state-in chhiatna an tawh vanga an thil hloh zat pawh chhut chhuah a ngai dawn tih a sawi bawk.

Ministry of Home Affairs-a Joint Secretary AV Dharma Reddy kaihhruaiin August 8 khan inter-ministerial team chuan Kerala-a hi an tlawh tawh a, ruahsur leh tuilianin chhiatna a thlen dante an enfiah. Hemi hnu August 12 khan Union Home Minister Rajnath Singh chuan tlawh lehin, ṭanpuina cheng vaibelchhe 100 pek a nih tur thu a puang a, August 16 khan Prime Minister Narendra Modi pawhin tlawh lehin, sorkar laipuiin ṭanpuina cheng vaibelchhe 500 a pek belh tur thu a puang leh a ni.

Sorkar laipui chuan tuilian vanga thi chhungte hnenah ralna cheng nuai hnih ṭheuh pek an nih tur thu leh, hliam tuarte chu Rs 50,000 ṭheuh pek an nih tur thu a puang bawk. Heng sumte hi Prime Minister's Relief Fund aṭanga pek an ni ang.

State sorkarin alo chhut chhinaah chuan tuilian leh leiminin chhiatna a thlen avanga an hloh zat hi cheng vaibelchhe 20,000 dawn a tling tawh a ni. Sorkar laipui chuan kawng hrang hrangin tuilian tuarte chhanchhuah leh chhawmdawlna kawngah hian a pui reng bawk a ni. State hrang hrang pawhin Kerala ṭanpuina hi an pe a, CM Vijayan chuan Chief Minister's Distress Relief Fund aṭangin ṭanpuina cheng vaibelchhe 210 an dawn thu leh, a bak cheng 160 dawn tur an la nei bawk niin a sawi.

CM chuan harsatna an tawh mekah an state dinhmun thlir leh, hma lak dan turte relin nimin khan all-party meeting a ko.

Tuilian tuarte chhanchhuah hna hi Army, Navy, leh NDRF team ten an la thawh chhunzawm reng a, civil mi eng emaw zatin an pui bawk. Army's Southern Command Lt. Gen. D R Soni chuan tuilianin an in a chim avanga inchunga tlanchhiaa tangkhang leh kalpawh mai theih loha tangkhangte chu helicopter hmanga lakchhuah an nih thu a sawi.

State sorkar chuan tuilian tuarte chhanchhuah hna thawhna kawnga sipaite puitu, sangha mantute chawimawina hun chu August 29 hian buatsaih a tum a ni tih a sawi. August 30 hian Kerala Assembly special session neih a ni dawn bawk a, tuilianin a thil tihchhiat te dinthar lehna tura hma lak dan turte ngaihtuah a ni ang. Cabinet chuan an state dinthar lehna tura sum tuakna atan state GST-ah chhiah 10% lak a tum a, department hrang hrangte chu hma lak dan tur ruahmanna te siam turin an ti bawk.

Sorkar laipui bakah state sorkar hrang hrangte chuan Kerala ṭanpuina hi an pe a, nimin khan United Arab Emirates (UAE) chuan kerala ṭanpuina tur hian cheng vaibelchhe 700 a pek tur thu a sawi. He thu hi Abu Dhabi Crown Prince leh Deputy Supreme Commander Sheikh Mohammad Bin Syed Al Nahyan chuan Prime Minister Narendra Modi leh Kerala Chief Minister Pinarayi Vijayan te a hrilh a ni.